पिंपरी (Pclive7.com):- सुसगाव येथील गोल्डन मॅनचे घर फोडणाऱ्या चोरट्यांच्या पोलिसांनी मुसक्या आवळल्या आहेत. त्यांच्याकडून ७१ तोळे सोने आणि ८ लाख रुपये रोख रक्कम जप्त केली आहेत. हिंजवडी पोलिसांच्या तपास पथकाने ही कामगिरी केली.
अजय सर्जा नानावत (२७, रा. मुळशी), कन्हैया विजय राठोड (१९, रा. पाथरगाव, ता. मावळ), आशा राजूभाई ठक्कर (४०, रा. अहमदाबाद गुजरात) अशी अटक केलेल्या आरोपींची नावे आहेत. तसेच, त्यांच्या साथीदारांचा शोध सुरू आहे.
पोलिस उपायुक्त डॉ. काकासाहेब डोळे यांनी दिलेल्या माहितीनुसार, सुसगाव परिसरातील गोल्डन मॅन अशी ओळख असलेल्या पोपट चांदेरे (४४, रा. सुसगाव) यांचे घर फोडून अज्ञातांनी ११९ तोळे दागिने आणि दोन लाख ९० हजार रोकड चोरून नेली. २४ डिसेंबर रोजी हा प्रकार उघडकीस आला.
या गुन्ह्याचा तपास करत असताना हिंजवडी पोलिसांनी परिसरातील ५७ पेक्षा अधिक सीसीटीव्ही तपासले. दरम्यान, दोघेजण हिंजवडी फेज तीन येथील बापूजी बुवा मंदिरात येणार असल्याची माहिती पोलिसांना मिळाली. त्यानुसार, पोलिसांनी दोघांना सापळा लावून ताब्यात घेतले. त्यांच्याकडे चौकशी केली असता आरोपींची टोळी असून, यापूर्वी त्यांनी पुणे जिल्ह्यात तब्बल ४८ ठिकाणी अशा प्रकारचे गुन्हे केल्याचे उघड झाले.
ही कामगिरी वरिष्ठ पोलिस निरीक्षक डॉ. विवेक मुगळीकर, पोलीस निरीक्षक सुनील दहिफळे, सोन्याबापू देशमुख, सहायक पोलीस निरीक्षक सागर काटे, राम गोमारे, उपनिरीक्षक अजित काकडे, पोलीस अंमलदार बंडू मारणे, बाळकृष्ण शिंदे, योगेश शिंदे, कुणाल शिंदे, बापूसाहेब धुमाळ, कैलास केंगले, विक्रम कुदळ, अरुण नरळे, रितेश कोळी, श्रीकांत चव्हाण, चंद्रकांत गडदे, कारभारी पालवे, दत्ता शिंदे, अमर राणे, ओमप्रकाश कांबळे, सागर पंडित, सुभाष गुरव, सोनाली ढोणे, श्रुती सोनावणे, शालिनी वचकल यांनी केली.
दिवसा रेकी करून हेरायचे सावज..
आरोपी अजय हा दिवसा घरांची रेकी करून रात्री साथीदारांसोबत मिळून घरफोडी करीत असल्याचे तपासात समोर आले आहे. फिर्यादी चांदेरे यांच्या घरावर आरोपींनी दोन दिवस पाळत ठेवली होती. दरम्यान, २३ डिसेंबर रोजी चांदेरे कोकण येथे गेले असताना चोरट्यांनी ही घरफोडी केली. घराच्या समोरील बाजूला असलेल्या सीसीटीव्ही मध्ये हा प्रकार कैद झाला असून अवघ्या दोन मिनिटात ही चोरी केल्याचे उघड झाले आहे.
Join Our Whatsapp Group