चिंचवड (Pclive7.com):- यंदाच्या गणेशत्सवात चिंचवड विधानसभेत माजी नगरसेवक शत्रुघ्न काटे यांचा झंझावात पहायला मिळाला. चिंचवड विधानसभेतील ३०० हून अधिक गणेश मंडळांनी शत्रुघ्न काटे यांना बाप्पांच्या आरतीसाठी आमंत्रित केले होते.
राज्यात विधानसभा निवडणुकीचे वारे वाहू लागले आहे आणि चिंचवड विधानसभा मतदारसंघावर सर्वांचे लक्ष लागले आहे. दरम्यान सर्वच इच्छुकांनी जोरदार मोर्चेबांधणी सुरू केली आहे. परंतू यात चर्चेतील आघाडीवर असलेले नाव म्हणजे शत्रुघ्न काटे यांचेच. चिंचवड विधानसभेसाठी इच्छुक असलेले भाजपचे माजी नगरसेवक शत्रुघ्न काटे यांना यंदाचा गणेशोत्सव चांगलाच पावला असल्याचे चित्र आहे. चिंचवड विधानसभा मतदारसंघातील तब्बल ३०० हून अधिक मंडळांनी बाप्पाची आरती करण्यासाठी काटे यांना आमंत्रित केले होते. यामध्ये पिंपळे गुरव, नवी सांगवी, जुनी सांगवी, पिंपळे सौदागर, रहाटणी, काळेवाडी, थेरगाव, वाकड, पिंपळे निलख, विशालनगर, रावेत, पुनावळे तसेच चिंचवडगाव या परिसरातील गणेश मंडळ तसेच गृहनिर्माण संस्थाना त्यांनी भेटी दिल्या.
गणेश मंडळ म्हटलं की त्यांचे नेतृत्व करणारा तरुण वर्ग डोळ्यासमोर येतो. याच गणेश मंडळांतील तरुण वर्गाने शत्रुघ्न काटे यांचा उत्स्फूर्तपणे स्वागत करीत त्यांना आपली पसंती दर्शवली आहे. चिंचवड मतदार संघातील त्यांच्या मनातील भावी आमदार म्हणून शत्रुघ्न काटे यांनाच कौल दिल्याचे चित्र आहे. आपल्या विकास कामाने पिंपळे सौदागर-रहाटणी प्रभागाचे कायापालट करणारे नेतृत्व म्हणून शत्रुघ्न काटे यांची ओळख शहर पातळीवर आहे. परंतु पक्ष संघटनेच्या पातळीवर सतत त्यांच्यावर अन्याय झाला.
महापौर, स्थायी समिती अध्यक्ष, पक्ष नेता तसेच शहर प्रमुख पद अश्या अनेक पदाचे मुख्य दावेदार असतांना देखील त्यांना बाजूला करण्यात आले. तसेच एकाच कुटंबाला प्राधान्य देत सर्व पदे दिल्यामुळे पक्षाने सर्वांची नाराजी ओढून घेतली. परंतु यावेळी पक्ष नेतृत्व नक्कीच त्यांच्या नावाची दखल घेतील आणि चिंचवड विधानसभा उमेदवारी त्यांनाच देतील असा विश्वास शत्रुघ्न काटे यांनी व्यक्त केला आहे.
Join Our Whatsapp Group