पिंपरी (Pclive7.com):- पिंपरी चिंचवड शहरात कोरोना लसीकरणाला नागरिकांचा चांगला प्रतिसाद मिळत आहे. शहरातील पिंपळे सौदागर भागात अनेक ठिकाणी लसीकरण केंद्रे सुरू झाली आहेत. तरी नागरिकांनी लसीकरण करुन घेण्यासाठी पुढे यावे, असे आवाहन स्थायी समितीचे सदस्य तथा नगरसेवक शत्रुघ्न काटे यांनी केले आहे.
महापालिकेने कोरोना लसीकरण केंद्रामध्ये वाढ केली आहे. सध्या महापालिकेच्या वतीने शाळा, सोसायट्यांमध्ये लसीकरण मोहिम राबविली जात आहे. दुसऱ्या टप्प्यात ४५ ते ५९ वयोगटातील व्याधीग्रस्त व्यक्ती (को-मॉर्बिड) आणि ६० वर्षापुढील ज्येष्ठ नागरिकांचे लसीकरण सुरु झाले आहे. तसेच १ एप्रिलपासून ४५ वर्षांपुढील सर्वांना कोरोनाची लस दिली जात आहे. त्यादृष्टीने महापालिका प्रशासन नियोजन करीत असल्याचे नगरसेवक काटे यांनी सांगितले.
पिंपळे सौदागर या उच्चभ्रु परिसरात काही ठिकाणी नागरिक स्वतःहून लसीकरणासाठी पुढे येत आहेत. यासाठी नागरिकांना ने-आण करण्यासाठी मोफत सुविधा उपलब्ध केली असल्याचे काटे यांनी सांगितले. सध्या कुणाल आयकॉन सोसायटी, अण्णासाहेब मगर हायस्कूल या ठिकाणी लसीकरण सुरू असून काही सोसायट्यांमध्ये एक दिवसांचे लसीकरण कॅम्प घेण्यात आला. यावेळी रोझलँड सोसायटीत लसीकरण कॅम्प घेण्यात आला. याला नागरिकांनी प्रतिसादही दिला
सध्या या भागातील मॅक्सकेअर आणि लोटस हॉस्पीटल येथे कोविड रुग्णांना दाखल करुन उपचार केले जात आहेत. सध्या तरी या भागात कोविड सेंटरची गरज भासत नाही. तरी या भागातील महापालिकेने घालून दिलेल्या नियमांचे पालन करुन प्रशासनाला सहकार्य करावे, असे आवाहन नगरसेवक शत्रुघ्न काटे यांनी केले आहे.