पिंपरी (Pclive7.com):- गाडीची चावी घेण्यासाठी गेलेल्या व्यक्तीला कुत्र्याने चावा घेतला. यात व्यक्ती जखमी झाली. याप्रकरणी कुत्र्याच्या मालक महिलेच्या विरोधात पोलिसांनी गुन्हा दाखल केला. पिंपळे सौदागर येथे १२ फेब्रुवारी रोजी सकाळी नऊच्या सुमारास ही घटना घडली.
नितन सत्यादास (३३, रा. पिंपळे सौदागर) यांनी याप्रकरणी रविवारी (दि.१८) सांगवी पोलिस ठाण्यात फिर्याद दिली. त्यानुसार संशयित महिलेच्या विरोधात पोलिसांनी गुन्हा दाखल केला. पोलिसांनी दिलेल्या माहितीनुसार, फिर्यादी सत्यादास हे गाडीची चावी घेत असताना संशयित महिलेच्या मालकीच्या कुत्र्याने सत्यादास यांना चावा घेतला. त्यात ते जखमी झाले. कुत्र्यापासून मानवी जीवितास धोका टाळण्यासाठी संशयित महिलेने पुरेशी खबरदारी घेतली नाही, त्यामुळे त्यांच्या मालकीच्या पाळीव कुत्र्याने सत्यादास यांना चावा घेत दुखापत केली, असे फिर्यादीत नमूद आहे. पोलिस उपनिरीक्षक किरण कणसे तपास करीत आहेत.