मुंबई (Pclive7.com):- केंद्रीय मंत्री नारायण राणे यांनी मुख्यमंत्री उद्धव ठाकरे यांच्याबद्दल केलेल्या आक्षेपार्ह वक्तव्याचे तीव्र पडसाद राज्यात उमटत आहेत. शिवसैनिक ठिकठिकाणी रस्त्यावर उतरले असून नारायण राणे व भाजपविरोधात आंदोलन करत आहेत. शिवसेनेचा बालेकिल्ला असलेल्या मुंबईत शिवसैनिकांनी थेट नारायण राणेंच्या जुहू येथील घरासमोर निषेध आंदोलन केलं.
युवा सेनेचे सचिव वरुण सरदेसाई यांच्या नेतृत्वाखाली युवा सैनिक व शिवसैनिक राणेंच्या बंगल्याबाहेर जमले व जोरदार घोषणाबाजी केली. भाजपचे काही कार्यकर्तेही यावेळी तिथं जमले. त्यामुळं तणाव निर्माण झाला. संतापलेल्या कार्यकर्त्यांनी झेंड्याच्या दांड्यांनी एकमेकांवर हल्ला केला. पोलिसांनी वेळीच हस्तक्षेप करत परिस्थिती नियंत्रणात आणली. आंदोलकांना पांगवण्यासाठी पोलिसांनी शिवसैनिकांवर सौम्य लाठीमार केला. युवा सेनेचे सचिव वरुण सरदेसाई यांनी यावेळी राणे पिता-पुत्रांवर जोरदार टीका केली.
राणेंच्या वक्तव्यानंतर शिवसैनिक जुहू येथील बंगल्यावर आंदोलन करणार असल्याचं आमदार नीतेश राणे यांना समजलं होतं. त्यावर नीतेश यांनी प्रतिक्रिया दिली होती. ‘इकडे येऊन दाखवा, असं आव्हान त्यांनी शिवसैनिकांना दिलं होतं. हे आव्हान स्वीकारून शिवसैनिक इथं आल्याचं वरुण सरदेसाई म्हणाले. ‘आम्ही उंदराच्या बिळासमोर आलो आहोत. पण त्यांनी काय केलं?, असा सवाल सरदेसाई यांनी केला. ‘भाजपचे कार्यकर्ते आमच्यावर दगडफेक करताहेत आणि पोलीस लाठीमार करत आहेत. उद्धव ठाकरे हे आमचे दैवत आहेत. त्यांच्यासाठी आम्ही एक काय, हजार लाठ्या खाऊ. भाजपच्या बांडगुळांना पळवून लावू,’ असं सरदेसाई म्हणाले.
Join Our Whatsapp Group