पिंपळे सौदागर (Pclive7.com):- महात्मा जोतिबा फुले यांच्या पुण्यतिथीनिमित्त उन्नती सोशल फाउंडेशन, डॉ. अग्रवाल नेत्र रुग्णालय आणि साईश्री व्हिटालाईफ हॉस्पिटल यांच्या संयुक्त विद्यमाने आयोजित मोफत नेत्र व आरोग्य तपासणी शिबिराला नागरिकांचा उत्स्फूर्त प्रतिसाद मिळाला. वंचित समाजासाठी आपले आयुष्य वेचणारे पद्मश्री गिरीश प्रभुणे यांच्या शुभहस्ते या आरोग्य शिबिराचे उद्घाटन संपन्न झाले. एकूण १९७ नागरिकांनी या उपक्रमाचा लाभ घेतला. नेत्र तपासणी, मोतीबिंदू तपासणी, कोरडे डोळे, काचबिंदू, रेटिना तपासणी, ॲम्ब्लिओपिया तसेच शुगर, बीपी, नाडी, शरीर तापमान, SPO2 यांसह सर्व तपासण्या नागरिकांसाठी मोफत करण्यात आल्या. दिवसभर शिबिरात नागरिकांची मोठी गर्दी होती आणि सर्व तपासण्या अनुभवी डॉक्टरांच्या मार्गदर्शनात पार पडल्या. शिबिराचा लाभ घेतलेल्या नागरिकांनी या उपक्रमाचे मनापासून स्वागत केले.
या उपक्रमामागील संकल्पना विशद करत उन्नती सोशल फाउंडेशनच्या अध्यक्षा डॉ. सौ. कुंदाताई संजय भिसे म्हणाल्या, “महात्मा फुले यांनी समाजजागृती आणि सेवा हाच खरा धर्म मानला. त्यांच्याच प्रेरणेने आरोग्यसेवा सर्वांपर्यंत पोहोचावी हा उन्नती सोशल फाउंडेशनचा संकल्प आहे. नागरिकांना सोयीस्कर, सुलभ आणि नि:शुल्क आरोग्यसेवा उपलब्ध करून देणे ही आमची सामाजिक बांधिलकी आहे. या शिबिराला मिळालेला प्रचंड प्रतिसाद आमच्यासाठी प्रेरणादायी आहे.”
यानंतर प्रतिक्रिया देताना भाजपा शहराध्यक्ष शत्रुघ्न बापू काटे म्हणाले, “आरोग्य हीच खरी संपत्ती आहे. नियमित तपासणी आणि वेळेवर उपचार गरजेचे आहेत. अशा उपक्रमांमुळे समाजात आरोग्याबाबत जागरूकता निर्माण होते आणि नागरिक स्वतःच्या आरोग्याबाबत सजग होतात. उन्नती सोशल फाउंडेशन ही संस्था सामाजिक संवेदना आणि लोकहिताच्या कार्याची परंपरा जपत सतत प्रभावी उपक्रम राबवत आहे.”
तर या उपक्रमाबाबत बोलताना पद्मश्री गिरीश प्रभुणे म्हणाले, “महात्मा फुलेंचा पुण्यतिथीच्या निमित्ताने राबविलेले हे आरोग्य व नेत्र तपासणी शिबिर हे समाजप्रबोधनाचे आणि लोककल्याणाचे उत्कृष्ट उदाहरण आहे. अशा उपक्रमांमुळे सामाजिक जबाबदारीची जाणीव अधिक दृढ होते. उन्नती सोशल फाउंडेशनचा सेवाभाव खरोखरच कौतुकास्पद आहे.”
याप्रसंगी पद्मश्री गिरीश प्रभुणे, भाजपा शहराध्यक्ष शत्रुघ्न बापू काटे, संस्थापक संजय भिसे, अध्यक्षा डॉ.कुंदाताई भिसे, संदेश काटे, सखाराम ढाकणे, अशोक वारकर, बाळासाहेब चौधरी, सुभाषचंद्र पवार तसेच ऑल सिनियर सिटीझन असोसिएशन, लिनयर गार्डन जेष्ठ नागरिक संघ, नवचैतन्य हास्य परिवार, आनंद हास्य क्लब, विठाई वाचनालय यांचे प्रतिनिधी उपस्थित होते.
Join Our Whatsapp Group