पिंपरी (प्रतिनिधी):- हुक्का पिण्यासाठी आठवी इयत्तेत शिकणाऱ्या विद्यार्थ्यांकडून शाळेच्या वर्गाचाच वापर होत असल्याचा धक्कादायक प्रकार निगडीतील यमुनानगरमध्ये उघडकीस आला आहे. या प्रकरणी संबंधित शाळेने दोन विद्यार्थ्यांचे निलंबन केले आहे. सध्या शाळेत सहामाही परीक्षा सुरू असून, बुधवारी (दि. ११) पेपर झाल्यानंतर वर्गातच हुक्का पिणे सुरू असल्याचे उघड झाल्यावर शिक्षक हादरून गेले आहेत.
पहिले ते दहावी इयत्तेपर्यंत चालणाऱ्या या खासगी शाळेत निगडी प्राधिकरण परिसरातील मोठ्या संख्येने विद्यार्थी शिक्षण घेतात. शहरातील एक नावाजलेली संस्था म्हणून देखील या शाळेची ओळख आहे. काही महिन्यांपूर्वी या शाळेत शिकणाऱ्या आठवी इयत्तेतील काही मुले हुक्काचे साहित्य घेऊन वर्गात येत असल्याचे एका शिक्षकाच्या लक्षात आले. त्यांनी वर्गातील सर्व विद्यार्थ्यांची दप्तरेही तपासली. मात्र, शिक्षक दप्तर तपासणार असल्याचे आधीच समजल्याने एका विद्यार्थ्याने हुक्काचे सर्व साहित्य एका मुलीच्या दप्तरात लपविले. त्यामुळे ही घटना तेव्हा उघड झाली नाही. त्यानंतर बुधवारी (दि. ११) शाळेच्या तिसऱ्या मजल्यावरून थोडा धूर दिसून आला. तसेच सीसीटीव्हीमध्येही हा सर्व प्रकार दिसल्यावर शिक्षक हबकले. त्यांनी विद्यार्थ्यांना याचा जाब विचारला. त्यांच्या पालकांना बोलावून दोघांचे निलंबन केल्याचे सांगितले. या दोन विद्यार्थ्यांपैकी एकाचा मामा पिंपरी चिंचवड महापालिकेत नगरसेवक आहे.
शहरातील हुक्का पार्लरवर कारवाईचे आदेश अनेकदा अतिवरिष्ठ अधिकाऱ्यांकडून दिले जातात. मात्र, तरीदेखील भोंडवे कॉर्नर, रावेत, सोमाटणेफाटा, हिंजवडी, पुणे-बेंगळुरू मार्गावरील हॉटेलमध्ये सर्रास हुक्का पार्लर जोमात सुरू आहेत. तसेच शहरातील बहुतांश पान टपऱ्यांवर हुक्काचे सर्व साहित्य सहज उपलब्ध होते. शाळेतील वर्गातच जर विद्यार्थी हुक्का ओढत असतील ती ही धोक्याची घंटा असल्याचे मत व्यक्त होत आहे.