पुलाच्या स्लॅबचे नुकसान, महापालिका आणि वाहतूक पोलिसांच्या नियोजनावर प्रश्नचिन्ह
पिंपरी (Pclive7.com) : चिंचवडहून पुण्याच्या दिशेने जाणाऱ्या पिंपरीतील ग्रेड सेपरेटरमध्ये शनिवारी (दि.१७ ऑक्टोबर) पहाटे एक कंटेनर अडकल्याची घटना घडली. या घटनेमुळे परिसरातील वाहतूक विस्कळीत होऊन वाहनांच्या लांबच लांब रांगा लागल्या. विशेष म्हणजे, कंटेनर अडकल्यानंतर चालक घटनास्थळावरून फरार झाल्याची माहिती समोर आली आहे. कंटेनरच्या धडकेमुळे पुलाच्या स्लॅबचेही मोठे नुकसान झाल्याचे सांगण्यात येत असून, कंटेनर बाहेर काढण्याचे आव्हान निर्माण झाले आहे.
पिंपरीतील ग्रेड सेपरेटरमध्ये अवजड आणि निर्धारित उंचीपेक्षा अधिक उंचीची वाहने अडकण्याच्या घटना यापूर्वीही घडल्या आहेत. अशा घटना टाळण्यासाठी आवश्यक प्रतिबंधात्मक उपाययोजना करणे गरजेचे असताना, पुन्हा एकदा कंटेनर अडकल्याने वाहतुकीचा प्रश्न ऐरणीवर आला आहे. या घटनेचा फटका पुण्याच्या दिशेने जाणाऱ्या वाहनचालकांना बसत असून, नागरिकांना वाहतूक कोंडीचा सामना करावा लागत आहे.
उंच वाहनांना प्रवेश मिळतोच कसा?
ग्रेड सेपरेटरमध्ये प्रवेश करण्यापूर्वी वाहनांच्या उंचीची मर्यादा स्पष्ट करणारे फलक, आवश्यक उंची प्रतिबंधक व्यवस्था आणि प्रभावी देखरेख असणे अपेक्षित आहे. असे असतानाही अवजड कंटेनर ग्रेड सेपरेटरमध्ये प्रवेश करून अडकत असल्याने या व्यवस्थेच्या अंमलबजावणीबाबत प्रश्न उपस्थित होत आहेत.
कंटेनर अडकल्यामुळे पुलाच्या स्लॅबचे नुकसान होणे ही केवळ वाहतूक कोंडीची बाब नसून, पुलाच्या सुरक्षिततेच्या दृष्टीनेही गंभीर बाब आहे. त्यामुळे संबंधित यंत्रणांनी नुकसानीची पाहणी करून पुलाच्या संरचनेची सुरक्षितता तपासणे आवश्यक आहे.
महापालिका आणि वाहतूक पोलिसांनी उपाययोजना कधी करणार?
अशा घटना घडू नयेत यासाठी पिंपरी-चिंचवड महापालिका प्रशासन आणि वाहतूक पोलिसांनी समन्वयाने उपाययोजना करणे आवश्यक आहे. ग्रेड सेपरेटरच्या प्रवेशद्वारावर उंची मर्यादेचे ठळक फलक, उंची प्रतिबंधक यंत्रणा आणि अवजड वाहनांवर नियंत्रण ठेवण्यासाठी प्रभावी व्यवस्था उभारण्याची गरज पुन्हा अधोरेखित झाली आहे.
कंटेनर अडकल्यानंतर वाहतूक कोंडी, पुलाच्या संरचनेचे नुकसान आणि नागरिकांची गैरसोय अशा समस्या निर्माण होत असतील, तर भविष्यात अशा घटना रोखण्यासाठी ठोस पावले उचलणे आवश्यक आहे. संबंधित प्रशासन या घटनेची दखल घेऊन कायमस्वरूपी उपाययोजना करणार का, असा सवाल वाहनचालक आणि नागरिकांकडून उपस्थित केला जात आहे.
Join Our Whatsapp Group