पिंपरी-चिंचवड पोलिस आयुक्तालयासाठी एकात्मिक सीसीटीव्ही प्रकल्पास HPCची मान्यता

AI-आधारित शहरव्यापी निगराणीमुळे गुन्हे नियंत्रण व सार्वजनिक सुरक्षा अधिक सक्षम

पिंपरी (Pclive7.com):- पिंपरी-चिंचवड पोलिस आयुक्तालयाच्या तंत्रज्ञानाधारित पोलिसिंगला मोठे बळ मिळाले असून, संपूर्ण आयुक्तालय क्षेत्रासाठी प्रस्तावित अत्याधुनिक एकात्मिक सीसीटीव्ही निगराणी प्रकल्पास महाराष्ट्र शासनाच्या गृह विभागाच्या उच्चस्तरीय समितीने (HPC) मान्यता दिली आहे. गृह विभागाचे अतिरिक्त मुख्य सचिव यांच्या अध्यक्षतेखाली झालेल्या बैठकीत या महत्त्वपूर्ण प्रकल्पाला हिरवा कंदील देण्यात आला.

वेगाने विकसित होणारे औद्योगिक व नागरी शहर असलेल्या पिंपरी-चिंचवडमध्ये कायदा व सुव्यवस्था, गुन्हे प्रतिबंध, वाहतूक नियंत्रण, गर्दी व्यवस्थापन तसेच आपत्ती व्यवस्थापन अधिक प्रभावी करण्याच्या दृष्टीने हा प्रकल्प अत्यंत महत्त्वाचा ठरणार आहे.

अलिकडच्या काळात शहराच्या झपाट्याने वाढणाऱ्या लोकसंख्येचा विचार करून पिंपरी-चिंचवड पोलिस दलाने पायाभूत सुविधांमध्ये मोठ्या प्रमाणावर वाढ केली आहे. सहा नवीन पोलिस ठाण्यांची स्थापना, दहा सहाय्यक पोलिस आयुक्त, पाच पोलिस उप-आयुक्त आणि एका अतिरिक्त पोलिस आयुक्त पदाची निर्मिती करून त्या पदांवर सक्षम अधिकाऱ्यांची नियुक्ती करण्यात आली आहे. यासोबतच नवीन पोलिस आयुक्तालय इमारत, पोलिस ठाण्यांच्या इमारती, प्रशस्त परेड मैदान, आधुनिक मोटार परिवहन विभाग तसेच विविध पोलिस कार्यालयांसाठी आवश्यक जमीन संपादन करण्यात आली आहे.

या पायाभूत सुविधांच्या जोडीने आता मंजूर झालेला सीसीटीव्ही निगराणी प्रकल्प संपूर्ण आयुक्तालयासाठी एकात्मिक व केंद्रीकृत व्यवस्था निर्माण करणार आहे. या प्रकल्पाअंतर्गत पिंपरी-चिंचवड स्मार्ट सिटी मिशन आणि पिंपरी-चिंचवड महानगरपालिकेमार्फत आधीच बसविण्यात आलेले सीसीटीव्ही कॅमेरे एकत्रित करण्यात येणार असून, ज्या ठिकाणी अद्याप कव्हरेज नाही अशा महत्त्वाच्या भागांत नवीन कॅमेरे बसविण्यात येणार आहेत.

चाकण, तळेगाव आणि भोसरी एमआयडीसीसारख्या प्रमुख औद्योगिक परिसरांबरोबरच हिंजवडी आयटी हबमध्ये विशेष निगराणी ठेवण्यात येणार आहे. तसेच देहू आणि आळंदी या धार्मिक तीर्थक्षेत्रांमध्ये सण-उत्सव व पालखी काळात होणाऱ्या लाखो भाविकांच्या गर्दीचे प्रभावी नियोजन व वाहतूक व्यवस्थापन करण्यासाठी मजबूत सीसीटीव्ही जाळे उभारण्यात येणार आहे.

या प्रकल्पात एआय-आधारित प्रगत व्हिडिओ अ‍ॅनालिटिक्सचा वापर करण्यात येणार असून, त्याच्या माध्यमातून गुन्हे शोध, गुन्हे तपास, वाहतूक नियमांची अंमलबजावणी, गर्दी नियंत्रण आणि आपत्कालीन प्रतिसाद अधिक वेगवान व प्रभावी होणार आहे. नव्या पोलिस आयुक्तालयात अत्याधुनिक एकात्मिक कमांड अँड कंट्रोल सेंटर स्थापन करण्यात येणार असून, त्याचे थेट दृश्य सर्व परिमंडळ पोलिस उप-आयुक्त, वाहतूक विभाग व पोलिस ठाण्यांना उपलब्ध राहणार आहे.

या प्रकल्पाच्या अंमलबजावणीसाठी पोलिस आयुक्त पिंपरी-चिंचवड यांच्या अध्यक्षतेखाली प्रकल्प अंमलबजावणी समिती (PIC) स्थापन करण्यात आली असून, त्यामध्ये पीसीएमसी, पीएमआरडीए, स्मार्ट सिटी, एमआयडीसी आणि पोलिस विभागातील वरिष्ठ अधिकाऱ्यांचा समावेश आहे.

पोलिस आयुक्त विनय कुमार चौबे यांच्या नेतृत्वाखाली पिंपरी-चिंचवड पोलिस दलाने पायाभूत सुविधा विकास आणि आधुनिक तंत्रज्ञानाच्या प्रभावी वापरावर सातत्याने भर दिला आहे. या सीसीटीव्ही प्रकल्पास मिळालेली HPCची मान्यता नागरिकांमध्ये सुरक्षिततेची भावना अधिक दृढ करेल आणि सुरक्षित व स्मार्ट पिंपरी-चिंचवड शहर घडविण्यास मोलाची ठरेल.