पिंपरी (Pclive7.com):- प्रेमात आणि युध्दात सर्व काही माफ असतं अस म्हटलं जातं. मात्र, पिंपरी चिंचवड शहरातील मोबाईल चोरट्यांनी प्रेयसीसाठी चोर बनल्याचा अजब प्रकार समोर आला आहे. याप्रकरणी दोघांना दरोडा विरोधी पथक गुन्हे शाखेने बेड्या ठोकल्या आहेत. सागर सावळे आणि निलेश भालेराव अशी आरोपींची नावे आहेत. या दोघांनी प्रेयसीसाठी २६ मोबाईल आणि तीन दुचाकी चोरल्याचे उघड झाले आहे. सागर हा २२ वर्षांचा असून निलेश हा अवघ्या १९ वर्षांचा आहे.
पोलिसांनी दिलेल्या माहितीनुसार, गेल्या काही दिवसांपासून भोसरी उड्डाण पुलाच्या खाली दुचाकीवरून आलेले अज्ञात मोबाईलवर बोलत पायी चालणाऱ्या व्यक्तींचे मोबाईल हिसकावत असल्याचं समोर आले होते. याची माहिती दरोडा विरोधी पथकाला मिळाली होती. त्यानुसार त्यांनी भोसरी उड्डाण पुलाखाली सापळा रचून आरोपींना अटक केली.
आरोपींकडे अधिक चौकशी केली असता दोन्ही आरोपी हे काम प्रेयसींना खूष करण्यासाठी करायचे अशी माहिती समोर आली. दोघेही आरोपी तरुण असून या दोघांचेही प्रेमसंबंध होते. त्यामुळेच आपल्या प्रेयसीला इम्प्रेस करण्यासाठी ते मोबाईल चोरत असल्याची कबुली त्यांनी पोलिसांसमोर दिली आहे.
दोन्हीही आरोपी आपल्या प्रेयसींना दर थोड्या दिवसांनी नवीन मोबाईल बदलून द्यायचे. प्रेयसीला चोरीतील मोबाईल देऊन त्यांना खुश करण्यासाठी या दोघांनी गुन्हेगारीचा मार्ग स्वीकारला होता. दोघेही जण चोरलेले मोबाईल आपल्याला देत असल्याची माहिती प्रेयसीला नसल्याचं पोलिसांनी सांगितले आहे. दोघांकडून दोन लाख ४२ हजार रुपये किंमतीचे २६ मोबाईल आणि तीन दुचाकी असा ४ लाख १२ हजारांचा मुद्देमाल पोलिसांनी हस्तगत केला आहे. या दोघांच्या चौकशीमध्ये एकूण नऊ गुन्हे उघडकीस आले आहेत.
ही कारवाई पिंपरी चिंचवडचे पोलीस आयुक्त कृष्ण प्रकाश, अपर पोलीस आयुक्त रामनाथ पोकळे, पोलीस उप आयुक्त सुधीर हिरेमठ, सहा. पोलीस आयुक्त प्रेरणा कट्टे यांच्या मार्गदर्शनाखाली दरोडा विरोधी पथकाचे वरिष्ठ पोलीस निरीक्षक उत्तम तांगडे, पोलीस उप निरीक्षक मंगेश भांगे, तसेच पोलीस अंमलदार महेश खांडे, राजेंद्र शिंदे, उमेश पुलगम, राहुल खारगे, विक्रांत गायकवाड, नितीन लोखंडे, आशिष बनकर, सागर शेडगे प्रविण माने, राजेश कौशल्य व गणेश कोकणे यांच्या पथकाने केली आहे.
Join Our Whatsapp Group