पिंपरी (Pclive7.com):- संसारात विघ्न आलं की मग पती-पत्नी घटस्फोटासाठी न्यायालयाचे दार ठोठावतात. ही बाब काय नवीन नाही. सध्या पिंपरी चिंचवडमध्ये राहणाऱ्या दाम्पत्यांमध्ये वीस वर्षांच्या संसारात वादाची ठिणगी पडली. यातून पत्नीनं न्यायालयात धाव घेत, पोटगीची मागणी केली. या रागातून पतीने अमानवी विकृतीचा कळस गाठला. पत्नी मुलांची कागदपत्रे घेण्यासाठी घरी आली. तेंव्हा इच्छेविरुद्ध शारीरिक संबंध ठेवले अन गुप्तांगात हळदी-कुंकू भरत त्यात लिंबू पिळले. असा धक्कादायक आरोप पत्नीने केलाय. यामुळं शहरातच नव्हे राज्यभर खळबळ उडालेली आहे. घटना वर्षभपूर्वीची असून याप्रकरणी पीडित पत्नीनं सांगवी पोलीस स्टेशनमध्ये नुकताच गुन्हा दाखल केला आहे. हा संतापजनक प्रकार पिंपळे निलखच्या विशालनगर मध्ये घडला आहे.
आरोपी पती आणि पीडित पत्नीचा विवाह २००४ मध्ये झालाय. या दाम्पत्याला तीन मुले ही आहेत. दरम्यानच्या काळात पती-पत्नींमध्ये कौटुंबिक वादाला तोंड फुटलं होतं. अनेकदा हे वाद विकोपाला गेले अन काही काळात ते मिटले. मात्र २०२३ मध्ये झालेल्या खडाजंगीत हे दोघे विभक्त झाले. पीडित महिला आपल्या दोन्ही मुलांना घेऊन स्वतंत्र राहू लागल्या. त्यानंतर आरोपी पती हा पिंपळे निलख परिसरात दुसऱ्या ठिकाणी राहण्यासाठी गेला. मग पत्नीनं घटस्फोट आणि पोटगीसाठी न्यायालयात धाव घेतली.
यामुळे पती चांगलाच संतापला. अशातच जून २०२४ मध्ये मुलांची कागदपत्रे आणि शाळोपयोगी वस्तू घेण्यासाठी पत्नी पतीच्या घरी गेली. तेंव्हा पती दारूच्या नशेत होता. त्यावेळीही पतीने पोटगी मागितली यावरून वाद घालायला सुरुवात केली. अन् अश्लील शिवीगाळ सुरु केली. पत्नीनं त्याकडे दुर्लक्ष केलं आणि अबोला ठेवला. मग पतीने धारदार शस्त्र दाखवून इच्छेविरुद्ध शारीरिक संबंध निर्माण केले. तसेच गुप्तांगात हळदी-कुंकू भरून, त्यात लिंबू पिळले. आता मी तुझ्यावर जादूटोणा केलायं, आता तू वेडी होणार आहेस. पण मी तुझ्यासोबत जे काही केलं, याबद्दल कोणाला काही सांगितलं तर जीवे मारुन टाकेन अशी धमकी ही दिली. असे पत्नीने फिर्यादीत आरोप केले आहेत. त्या अनुषंगाने सांगवी पोलीस स्टेशनमध्ये गुन्हा दाखल करण्यात आला आहे. जून २०२४ मध्ये नेमकं काय-काय घडलं, याचा तपास आता पोलीस करत आहेत.
Join Our Whatsapp Group