पिंपरी (Pclive7.com):- पिंपरी चिंचवडचे पोलीस आयुक्त विनयकुमार चौबे यांनी अवैध शस्त्रांच्या विरोधात विशेष मोहीम राबवली. या मोहिमेत अवघ्या २५ दिवसांमध्ये तब्बल ५० पिस्तूल जप्त करण्यात आले आहेत. यामध्ये सर्व पोलीस स्टेशन, गुन्हे शाखा यांच्यामध्ये स्पर्धा घेण्यात आली. या स्पर्धेत गुन्हे शाखा युनिट चारने ९ पिस्तूल जप्त करत पहिला क्रमांक मिळविला आहे. गुंडाविरोधी पथकाने ७ पिस्तूल जप्त करत दुसरा तर युनिट दोनने तिसरा क्रमांक मिळवला आहे. ही मोहीम १३ ऑगस्ट ते दोन सप्टेंबर या कालावधीत घेण्यात आली.
या मोहिमेत चाळीस गुन्हे दाखल करून ४५ आरोपींना अटक करण्यात आली आहे. त्यांच्याकडून ५० पिस्तूल ७९ काडतुसे जप्त केली आहेत. तसेच धारदार घातक शस्त्र बाळगणाऱ्यांवर ९४ गुन्हे दाखल करून ६६ आरोपींना अटक करण्यात आली आहे. त्यांच्याकडून ९१ कोयता, १२ तलवार, चार पालघन, सहा चाकू, अशी शास्त्रे जप्त करण्यात आली आहेत. जप्त केलेल्या ५० शस्त्रांमध्ये १ गावठी कट्टा तर ४९ पिस्तूल आहेत.
या मोहिमेअंतर्गत विशेषतः गुन्हे शाखा युनिट चारने मोक्यातून सुटलेला आरोपी पवन देवेंद्र बनेटी (वय २४, रा. पिंपळे गुरव) याला अटक करून त्याच्याकडून दोन पिस्टल व दोन जिवंत काडतुस जप्त केले. तसेच पिंपरी चिंचवड आयुक्तालय हद्दीतील सराईत गुन्हेगार गणेश कांबळे ऊर्फ मॅड गण्या (वय २३, रा. निराधार नगर, पिंपरी), ऋषीकेश ऊर्फ शेऱ्या राजु आडागळे (वय २४, रा. उर्से, ता. मावळ, जि. पुणे), बाबा सैफन शेख (वय २७, रा. पिंपळे गुरव), राहुल ऊर्फ सोन्या प्रकाश ढगे (वय २५, रा. सुसगांव ता. मुळशी, जि. पुणे), प्रताप ऊर्फ बाळु हनुमंत पवार (वय ३२, रा. पिरंगुट, ता. मुळशी, जि. पुणे), वैभव रामकृष्ण विटे (वय २८, रा. तळेगाव स्टेशन, ता. मावळ, जि. पुणे) यांच्यासह २५ सराईत गुन्हेगारांना अटक करण्यात आली आहे.
सदरची कारवाई पोलीस आयुक्त विनय कुमार चौबे, पोलीस सह आयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उप-आयुक्त (परि-०२) विशाल गायकवाड, पोलीस उप-आयुक्त (परि-१) संदिप आटोळे, पोलीस उप-आयुक्त (परि-३) डॉ. बापु बांगर, पोलीस उप-आयुक्त (गुन्हे) शिवाजी पवार, सर्व सहा. पोलीस आयुक्त यांच्या मार्गदर्शनाखाली सर्व पोलीस स्टेशनचे प्रभारी अधिकारी व अमंलदार, सर्व गुन्हे शाखेचे प्रभारी अधिकारी व अंमलदार यांनी ही कामगिरी केली आहे.
Join Our Whatsapp Group