पिंपरी (Pclive7.com):- पिंपरी चिंचवड शहरातील कायदा व सुव्यवस्था कायम राखण्यासाठी पोलिसांनी कडक उपाययोजना करण्यास सुरवात केली आहे. गेल्या ६ महिन्यांत पिंपरी चिंचवड शहर आणि चाकणमधील तब्बल ४० जणांना तडीपार केले आहे. आगामी लोकसभा आणि विधानसभा निवडणुकीच्या पार्श्वभूमीवर तडीपार केलेल्यांमध्ये राजकीय कार्यकर्त्यांचाही समावेश आहे.
छोटे मोठे गुन्हे करून अनेक सराईत गुन्हेगार परिसरात आपले बस्तान बसवितात. अटक झाल्यावर जामिनावर बाहेर येतात आणि पुन्हा गुन्हे करतात. त्यांच्या दहशतीमुळे अनेकदा नागरिक तक्रार करण्यासाठी पुढे येत नाहीत. याचाच गैरफायदा घेत ते आणखी गुन्हे करतात. त्यांची ही गुन्हेगारी मोडीत काढण्यासाठी पोलिस अशा सराईत गुन्हेगारांना तडीपार करतात.
पिंपरी चिंचवड पोलिस आयुक्तांची स्थापना सहा महिन्यांपूर्वी म्हणजे १५ ऑगस्ट २०१८ रोजी झाली. त्या वेळी शहरात वाहनांच्या तोडफोडीच्या घटना घडत होत्या. या गुन्ह्यांमध्ये सराईत गुन्हेगारांचाही मोठ्या प्रमाणात समावेश होता. या गुन्हेगारांच्या विरोधात कठोर पावले उचलण्याचे आदेश पोलिस आयुक्त आर. के. पद्मनाभन यांनी दिले होते. त्यानुसार प्रत्येक पोलिस ठाण्यातील सराईत गुन्हेगारांची यादी तयार करण्यात आली होती. या यादीतील गुन्हेगारांना तडीपार करण्यास पोलिसांनी सुरवात केली आहे. परिमंडळ एकमधील तब्बल २४ जणांना तर परिमंडळ दोनमधील १४ जणांना पोलिसांनी तडीपार केले आहे.
परिमंडळ एकच्या पोलिस उपायुक्त स्मार्तना पाटील यांनी बुधवारी (ता. ३०) पाच जणांना प्रत्येकी दोन वर्षासाठी तडीपार केले. सुरेश ऊर्फ चिम्या शांताराम निकाळजे (वय ४२, रा. आदर्शनगर, पिंपरी), चंद्रकांत अनंत माने (वय २६, रा. वेताळनगर झोपडपट्टी, चिंचवडगाव), सुदर्शन ऊर्फ पिन्या संभाजी राक्षे (वय २२, रा. शास्त्री चौक, आळंदी रोड, भोसरी), सोमनाथ ऊर्फ तम्मा हनुमंत लष्करे (वय २१, रा. निगडी), नीलेश भाऊसाहेब कोळपे (वय ३१, रा. चिंचवड) अशी तडीपार केलेल्या आरोपींची नावे आहेत. निकाळजे हा रिपब्लिकन पक्षाचा कार्यकर्ता आहे.