चोपडा हायस्कूलच्या विद्यार्थ्यांनी घेतले हृदयविकाराच्या झटक्यातून बचावाचे धडे

पिंपरी चिंचवड महापालिका, वायसीएम रुग्णालय, स्मार्ट सिटीचा आरोग्य जनजागृती कार्यक्रम

पिंपरी (Pclive7.com):- पिंपरी चिंचवड महानगरपालिका, वायसीएम रुग्णालय, स्मार्ट सिटी व अखिल भारतीय भूलतज्ञ संघटना (सोसायटी ऑफ ऍनेस्थेसियोलॉजिस्ट) पिंपरी चिंचवड शाखेच्यावतीने श्री जैन विद्या प्रसारक मंडळ संचलित श्रीमती गेंदीबाई ताराचंद चोपडा हायस्कूल व ज्यू. कॉलेज चिंचवड येथे हृदयविकाराच्या झटक्यासारख्या आपत्कालीन परिस्थितीत एखाद्या व्यक्तीचे प्राण कसे वाचवायचे याचे विद्यार्थ्यांना प्रशिक्षण देण्यात आले. यामध्ये मोठ्या संख्येने विद्यार्थ्यांनी सहभाग घेतला.

आरोग्य जनजागृती कार्यक्रमातंर्गत घेण्यात आलेल्या प्रशिक्षण कार्यशाळेत हृदयविकाराचा झटका, शॉक, अपघात इ. मार्गदर्शक तत्त्वांनुसार सीपीआर / सीओएलएस कार्यक्रम घेण्यात आले. तसेच, यामध्ये, वायसीएम रुग्णालयाचे उपअधीक्षक तथा भूलतज्ज्ञ डॉ. उज्ज्वला अंदुरकर, डॉ. मनीषा सूर्यवंशी, डॉ. वैशाली सापटणेकर यांनी प्रत्यक्ष प्रशिक्षण देवून विद्यार्थ्यांना “अवयव दान” या विषयावर मार्गदर्शन केले. यावेळी, प्राचार्य विक्रम काळे, विभाग प्रमुख मीना मेरुकर यांच्यासह मनपा अधिकारी व स्मार्ट सिटीचे प्रतिनिधी बिनीश सुरंदरन, जस्टीन मॅथ्थेव्ह, किरण लवटे यांचेसह शिक्षक- शिक्षकेत्तर कर्मचारी उपस्थित होते.

सहभागी विद्यार्थ्यांना मॅनेक्विनवर प्रशिक्षण देण्यात आले. प्रत्येक नागरिकाला जीवनरक्षक हेच ध्येय समोर ठेवून ऍनेस्थेसियोलॉजिस्टद्वारे सामान्य नागरिकांसाठी जागरूकता कार्यक्रम विनामूल्य घेण्यात येतो. प्रत्येक नागरिक जीवन वाचवू शकतो. या उद्देश्याने सोसायटी ऑफ अॅनेस्थेसियोलॉजिस्ट पिंपरी चिंचवड (एसएपीसी) इंडियन सोसायटी ऑफ अॅनेस्थेसियोलॉजिस्ट (ISA) यांच्या संयुक्त विद्यमाने COLS (कंप्रेशन ओन्ली लाईफ सपोर्ट) जनजागृती करण्यात येत आहे.