पिंपरी (Pclive7.com):- जमिनीवर प्लॉटिंग करून त्याची विक्री करण्याच्या बहाण्याने एका व्यक्तीची १ कोटी १५ लाख रुपयांची फसवणूक करण्यात आली. ही घटना ४ नोव्हेंबर २०११ ते २८ डिसेंबर २०२३ या कालावधीत नाणेकरवाडी येथे घडली.
याप्रकरणी शिवाजी रामजी बिरादार (६८, रा. चिंचवड) यांनी चाकण पोलिस ठाण्यात फिर्याद दिली आहे. त्यानुसार विवेकानंद वसंत शेंडे (रा. नाणेकरवाडी, खेड), सलीम मुबारक शेख (५७, रा. नाणेकरवाडी, खेड) यांच्या विरोधात गुन्हा दाखल करण्यात आला आहे.
फिर्यादी शिवाजी बिरादार यांची खेड तालुक्यातील नाणेकरवाडी येथे १.४१ हेक्टर जमीन आहे. ही जमीन विकसित करून तिथे प्लॉटिंग करून विक्री करण्यासाठी आरोपींनी बिरादार यांच्यासोबत व्यवहार केला. प्लॉटिंगची विक्री करून देण्यासाठी आरोपींनी बिरादार यांच्याकडून दोन कोटी रुपये घेतले. दरम्यान, बिरादार यांनी त्या जमिनीमध्ये लेव्हल करून डांबरी रस्ते बनवले. ड्रेनेज लाईनचे काम करून एक दोन गुंठ्यांचे प्लॉट तयार केले. त्यानंतर बिरादार यांची परवानगी न घेता आरोपींनी ती जमीन उत्तम वसंत कुसाकर यांना विक्री करण्यासाठी दिली.
आरोपींनी कोणतीही शासकीय परवानगी न घेता बेकायदेशीरपणे जमिनीची विक्री केली. त्यामुळे बिरादार यांनी आरोपींना दिलेले दोन कोटी रुपये आणि जागेत केलेल्या कामाचे १५ लाख रुपये मागितले. हे पैसे देण्याबाबत बिरादार आणि आरोपी यांच्यात लेखी करार झाला आहे. आरोपींनी बिरादार याना एक कोटी रुपये दिले. उर्वरित १ कोटी १५ लाख रुपये न देता त्यांची फसवणूक केली, असे फिर्यादीत नमूद आहे. पुढील तपास चाकण पोलिस करत आहेत.
Join Our Whatsapp Group