पिंपरी (Pclive7.com):- पावसाळ्यापूर्वी संपूर्ण पिंपरी चिंचवड शहरातील स्ट्रॉम वॉटर, ड्रेनेज लाइन, नाले सफाईची कामे त्वरित करण्यात यावी अशी मागणी राष्ट्रवादी काँग्रेसचे नेते तथा माजी विरोधी पक्षनेते नाना काटे यांनी महापालिका आयुक्त शेखर सिंह यांच्याकडे केली आहे.
नाना काटे यांनी आयुक्त शेखर सिंह यांना दिलेल्या निवेदनात म्हटले आहे की, दरवर्षी पावसाळ्यापूर्वी महापालिकेतर्फे शहरातील स्ट्रॉम वॉटर, ड्रेनेज लाइन, नाले सफाईची कामे केली जातात. परंतु यावर्षी तसे केल्याचे दिसत नाही, कारण सध्या अवकाळी पाऊस पडत आहे, व या अवकाळी पावसामुळे संपूर्ण शहरातील सर्व स्ट्रॉम वॉटर, ड्रेनेज लाइन, नाले यातील कचरा साफ न केल्याने स्ट्रॉम वॉटर, ड्रेनेज लाइन तुडुंब भरून जागो जागी रस्त्यावर पावसाचे पाणी साचत आहे. नागरिकांना वाहने चालवताना, रस्त्याने चालताना अडचणींना सामोरे जावे लागत आहे. तसेच या साचलेल्या पाण्याने घाणीचे साम्राज्य पसरत असून नागरिकांना आरोग्याच्या समस्येला देखील सामोरे जावे लागत आहे. ही खूप गंभीर बाब असून, आवकाळी पावसाने जर शहरवासीयांचे हाल होत असतील तर नुकताच येवून ठेपलेल्या मोठ्या पावसात शहराची अवस्था जलमय होईल व संपूर्ण शहराला मोठ्या संकटाला सामोरे जावे लागेल.
तरी महापालिका आयुक्त शेखर सिंह यांनी पावसाच्या पार्श्वभूमीवर सर्व बाबींचा विचार करून शहरातील स्ट्रॉम वॉटर, ड्रेनेज लाइन, नाले सफाई करण्याचे त्वरित आदेश संबंधित विभागाला देण्यात यावेत अशी मागणी नाना काटे यांनी केली आहे.
Join Our Whatsapp Group