पिंपरी (Pclive7.com):- पेट्रोल पंपावर काम करणाऱ्या दोन कामगारांनी स्वतःच्या बँक खात्याचा क्यूआर कोड वापरून त्यावर ग्राहकांचे पैसे घेतले. अशा प्रकारे कामगारांनी पंप मालकाची २१ लाख ५० हजार रुपयांची फसवणूक केली. हा प्रकार १ ऑगस्ट ते ८ नोव्हेंबर या कालावधीत भोसरी येथील लक्ष्मी एनर्जी अँड फ्युएल पंप येथे घडला.
गणेश सुरेश लांडगे (३५, रा. इंद्रायणीनगर, भोसरी) यांनी बुधवारी (दि.१४) याप्रकरणी भोसरी पोलिस ठाण्यात फिर्याद दिली आहे. त्यानुसार वैभव बाळासाहेब जाधव (रा. दिघी), रोहित विजय माने (रा. भोसरी) यांच्याविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, आरोपी वैभव आणि रोहित हे फिर्यादी लांडगे यांच्या पेट्रोल पंपावर काम करत होते. त्या वेळी त्यांनी पेट्रोल पंपाच्या बँक खात्याचा क्यूआर कोड लावण्याऐवजी स्वतःच्या बँक खात्याचा क्यूआर कोड लावला. त्यावर ग्राहकांचे पैसे घेऊन तब्बल २१ लाख ५० हजार रुपयांची फसवणूक केली. हा प्रकार डिसेंबर महिन्यात उघडकीस आला. त्यानंतर गुन्हा दाखल करण्यात आला आहे. भोसरी पोलिस तपास करीत आहेत.
Join Our Whatsapp Group