पिंपरी (Pclive7.com):- नुकताच १९ सप्टेंबरला संपूर्ण महाराष्ट्रात प्रदर्शित झालेल्या “कुर्ला टू वेंगुर्ला” या चित्रपटाला प्रेक्षकांचा उत्तम प्रतिसाद मिळत आहे. गावातील तरुणांच्या न होणाऱ्या लग्नाचा विषय हलक्याफुलक्या पद्धतीने चित्रपटात मांडण्यात आला असून, उत्तमोत्तम कलाकार असलेल्या या चित्रपटात मालवणी बोलीचाही तडका आहे.
या चित्रपटाच्या तंत्रज्ञ टीममध्ये पिंपरी चिंचवडकर मंडळींचा सहभाग पहायला मिळाला आहे. ज्यामध्ये राहुल चव्हाण (कार्यकारी निर्माता), विनोद खुरंगळे (असोसिएट डिरेक्टर), दीपक माने ( चिफ असोसिएट डिरेक्टर), प्रसाद मोरे (असिस्टंट सिनेमॅटोग्राफी), प्रशांत जगदाळे (असोसिएट आर्ट डिरेक्टर), शुभम सोलकर (VFX डिझाईनर), कोमल बोरडे(असिस्टंट कॉस्ट्युम डिझाईनर), शितल मोरे (असिस्टंट कॉस्ट्युम डिझाईनर), विक्रम कांबळे(असिस्टंट प्रोडक्शन), प्रमोद फंडे(असिस्टंट प्रोडक्शन), मंदार फाकटकर (प्रोडक्शन इन्चार्ज), आशिष वाघमारे(असिस्टंट सिनेमॅटोग्राफी), रुपेश वाघमारे (असिस्टंट साउंड डिझाईनर), लक्ष्मण साळुंखे (सहकलाकार) आदी मंडळींनी या चित्रपटासाठी आपले बहुमूल्य योगदान दिले आहे.
सध्या राज्यभरातील ग्रामीण भागात मुलांची लग्न जमणे ही समस्या झाली आहे. गावातल्या मुलींना शहराचे आकर्षण असते, त्यांच्याही आयुष्याबद्दल काही इच्छा-आकांक्षा असतात. परिणामी शहर आणि ग्रामीण भाग अशी एक दरी निर्माण झाली आहे. त्यामुळे ग्रामीण भागातील मुलांच्या रखडणाऱ्या लग्नाचा संवेदनशील विषय, त्याच्याशी जोडलेले सामाजिक मुद्दे, परस्पर नातेसंबंध अशा विषयाची मांडणी कुर्ला टू वेंगुर्ला या चित्रपटात करण्यात आली आहे. गंभीर विषयाची अत्यंत मनोरंजक पद्धतीने हाताळणी या चित्रपटात करण्यात आली आहे. त्यामुळे सहकुटुंब चित्रपटगृहात अनुभवावा असा हा चित्रपट आहे.
सिने कथा कीर्तन, चंद्रभागा स्टुडिओज आणि एम व्ही शरतचंद्र यांनी “कुर्ला टू वेंगुर्ला” या चित्रपटाची निर्मिती केली आहे. अमरजीत आमले, विजय कलमकर, चारुदत्त सोमण, नयना सोनावणे, अविनाश सोनावणे, एम. व्ही. शरतचंद्र हे या चित्रपटाचे निर्माते आहेत. चित्रपटाची कथा, पटकथा आणि संवाद लेखन अमरजीत आमले यांनी, तर दिग्दर्शन विजय कलमकर यांनी केलं आहे. अभिनेत्री वीणा जामकर, प्रल्हाद कुडतरकर, वैभव मांगले, सुनील तावडे, स्वानंदी टिकेकर, साईंकित कामत अशी उत्तम स्टारकास्ट या चित्रपटात आहे. यासोबतच अमेय परब, शेखर बेटकर आणि अनघा राणे या नवोदित कलाकारांचा अभिनयही आपल्याला पाहायला मिळणार आहे. रंगनाथ बाबू गोगीनेनी यांनी छायांकन, विजय कलमकर यांनी संकलन, अविनाश सोनावणे यांनी ध्वनिआरेखन, चंचल काळे, अमरजित आमले यांनी गीतलेखन, अक्षय खोत यांनी संगीत दिग्दर्शन, पार्श्वसंगीताची जबाबदारी निभावली आहे, तर वितरक म्हणून पिकल एंटरटेनमेंट काम पाहणार आहे.
माती आणि नाती जोडणारा, प्रत्येक कुटुंबाची गोष्ट सांगणारा “कुर्ला टू वेंगुर्ला” ह्या चित्रपटाला सिनेसृष्टीतील सुप्रसिद्ध अभिनेते सयाजी शिंदे, दिग्दर्शक राजेश मापुस्कर, अभिनेते सचिन खेडेकर, ज्येष्ठ अभिनेत्री उषा नाडकर्णी, सविता मालपेकर, ज्येष्ठ दिग्दर्शिका सई परांजपे आदी मान्यवरांची देखील पसंतीची पावती या चित्रपटाला मिळाली आहे.
Join Our Whatsapp Group