प्रारूप विकास आराखडा ‘नियोजन समिती’वर स्थायी समिती सभापती अभिषेक बारणे यांची निवड

पिंपरी-चिंचवडच्या विकासाचा ‘रोडमॅप’ ठरणार..!

पिंपरी (Pclive7.com):- पिंपरी-चिंचवड शहराच्या आगामी २० वर्षांतील विकासाची दिशा आणि चेहरामोहरा ठरवणाऱ्या अत्यंत महत्त्वपूर्ण प्रारूप विकास आराखडा ‘नियोजन समिती”वर महापालिकेचे स्थायी समिती सभापती अभिषेक बारणे यांची नियुक्ती करण्यात आली आहे. महापालिकेच्या सर्वसाधारण सभेत या निवडीवर शिक्कामोर्तब करण्यात आले. चिंचवड विधानसभेचे आमदार शंकरभाऊ जगताप यांच्या विशेष मार्गदर्शनाखाली ही जबाबदारी सोपवण्यात आली असून, यामुळे शहराच्या नियोजन प्रक्रियेत सिव्हील इंजिनियर आणि दांडगा प्रशासकीय अनुभव असलेल्या नेतृत्वाला संधी मिळाली आहे, त्यामुळे त्यांच्या अनुभवाचा फायदा शहर विकासाला होणार आहे. 

आमदार शंकरभाऊ जगताप यांचे नेतृत्व आणि ‘व्हिजन’..

शहराचा सर्वांगीण विकास साधण्यासाठी आमदार शंकरभाऊ जगताप यांनी नेहमीच सूक्ष्म नियोजनावर भर दिला आहे. पिंपरी-चिंचवडमधील वाढती लोकसंख्या, वाहतुकीचे जटील प्रश्न आणि विस्तारणाऱ्या नागरी सीमा लक्षात घेऊन त्यांनी शहरासाठी ‘व्हिजन २०४१’ समोर ठेवले आहे. त्यांच्याच मार्गदर्शनाखाली अभिषेक बारणे यांची या समितीवर वर्णी लागल्याने, प्रशासकीय नियोजनाला आता प्रबळ राजकीय इच्छाशक्तीची जोड मिळणार आहे.

स्थायी समिती सभापती म्हणून अनुभवाचा फायदा..

अभिषेक बारणे सध्या पिंपरी-चिंचवड महापालिकेच्या स्थायी समितीचे सभापती म्हणून यशस्वीरीत्या जबाबदारी सांभाळत आहेत. महापालिकेचा मुख्य आर्थिक कणा असलेल्या स्थायी समितीचे अध्यक्ष म्हणून त्यांना शहराच्या अर्थसंकल्पीय तरतुदी आणि विविध विकासकामांच्या अंमलबजावणीचा थेट अनुभव आहे. ९ हजार कोटींहून अधिक रकमेचा अर्थसंकल्प हाताळण्याचा त्यांचा हा अनुभव आता शहराच्या भौतिक आणि धोरणात्मक नियोजनात अत्यंत महत्त्वपूर्ण ठरणार आहे. विशेषतः विकास आराखड्यातील प्रकल्पांसाठी निधीची तरतूद करणे यामुळे अधिक सुलभ होणार आहे.

नागरिकांच्या सूचनांचा आदर होणार; लोकसहभागातून आदर्श आराखडा..

प्रारूप विकास आराखडा ‘नियोजन समिती’ हा केवळ शासकीय दस्तावेज न राहता तो थेट जनतेच्या हिताचा असावा, यासाठी लोकसहभागावर विशेष भर दिला जाणार आहे. शहरातील विविध सामाजिक संस्था, तज्ज्ञ, वास्तूविशारद आणि सर्वसामान्य नागरिकांनी मांडलेल्या प्रत्येक विधायक सूचनेचा आणि हरकतीचा या समितीमध्ये आदर केला जाईल. नवीन आराखडा अंतिम करताना पारदर्शकतेला सर्वोच्च प्राधान्य दिले जाणार आहे. आमदार शंकरभाऊ जगताप यांच्या मार्गदर्शनाखाली प्रशासन आणि नागरिक यांच्यात समन्वयाचा दुवा म्हणून ही समिती काम करेल. नागरिकांच्या अपेक्षा समजून घेऊनच पिंपरी-चिंचवडच्या उज्ज्वल भविष्याचा अंतिम नकाशा तयार केला जाईल, असा विश्वास बारणे यांनी व्यक्त केला आहे.

“पिंपरी-चिंचवड हे देशातील सर्वाधिक वेगाने विकसित होणारे शहर आहे. आमदार शंकरभाऊ जगताप यांच्या मार्गदर्शनाखाली माझ्यावर ही मोठी जबाबदारी सोपवण्यात आली आहे. स्थायी समितीचा सभापती म्हणून काम करताना मला शहराच्या आर्थिक आणि नागरी गरजांची जवळून ओळख झाली आहे. आता विकास आराखडा समितीच्या माध्यमातून शहराचा पुढील २० वर्षांचा विचार करून शाश्वत आणि पारदर्शक नियोजन करण्याला माझे प्राधान्य असेल. सर्वसामान्यांच्या हिताचा आणि शहराच्या वैभवात भर घालणारा ‘आदर्श’ आराखडा तयार करण्यासाठी आम्ही सज्ज आहोत.”

– अभिषेक बारणे, स्थायी समिती सभापती, पिंपरी चिंचवड महापालिका. 

नव्या आराखड्याचे प्रमुख पैलू..

पिंपरी-चिंचवडचा १९९७ चा विकास आराखडा आता जुना झाला असून, नवीन आराखडा हा शहराच्या भविष्यासाठी मैलाचा दगड ठरेल. या समितीच्या माध्यमातून खालील ५ मुख्य संकल्पांवर विशेष लक्ष दिले जाणार आहे:

वाहतूक क्रांती: मेट्रो मार्गांचा विस्तार करणे, अंतर्गत रिंग रोडचे अडथळे दूर करणे आणि ‘मल्टीमोडल ट्रान्सपोर्ट हब’ विकसित करून वाहतूक कोंडी मुक्त शहर करणे.

शाश्वत पर्यावरण: पवना, मुळा आणि इंद्रायणी नदी सुधार प्रकल्पांना (Riverfront Development) गती देऊन शहराचे पर्यावरण रक्षण करणे.

आधुनिक सुविधा: वाढत्या शहरीकरणासाठी आवश्यक जागतिक दर्जाची उद्याने आणि अत्याधुनिक क्रीडांगणांचे नियोजन करणे.

शिक्षण व आरोग्य: लोकसंख्यावाढीचा वेग लक्षात घेऊन नवीन शाळा आणि अद्ययावत रुग्णालयांसाठी जमिनींची आरक्षणे सुनिश्चित करणे.

स्मार्ट शाश्वतता: २०४१ पर्यंतच्या लोकसंख्येचा विचार करून तंत्रज्ञानावर आधारित ‘स्मार्ट’ नागरी सुविधांची निर्मिती करणे.

का महत्त्वाची आहे ही समिती?

शहराचे नागरीकरण प्रचंड वेगाने होत असताना ही समिती शहराचा ‘कायापालट’ करण्यासाठी महत्त्वाची ठरेल:

टी.पी. स्कीम (Town Planning Schemes): गुंठेवारी आणि अनधिकृत बांधकामांचा प्रश्न कायमस्वरूपी सुटण्यासाठी शास्त्रीय नियोजनाची गरज आहे.

औद्योगिक पट्टा: एमआयडीसी क्षेत्रातील पायाभूत सुविधांचे नियोजन करून उद्योगांना बळ देणे.

समन्वय: पुणे महापालिका आणि पीएमआरडीए यांच्याशी समन्वय ठेवून रस्ते जोडणी आणि प्रादेशिक विकास साधणे.

राहण्यायोग्यता (Livability): केवळ रस्ते आणि ड्रेनेज नाही, तर शहराचा ‘लिव्हेबिलिटी इंडेक्स’ सुधारून स्टार्टअप्स, आयटी हब (हिंजवडी) आणि लॉजिस्टिक हबसाठी पूरक वातावरण निर्माण करणे.