पिंपरी (Pclive7.com):- अजित पवारांनी पिंपरी चिंचवड शहर आणि मावळ लोकसभा मतदारसंघात भरपूर काम केलयं. तरी देखील मागची अनेक निवडणूक मावळची राष्ट्रवादी काँग्रेस पार्टी हारली आहे. आता माझी एक व्यक्तिगत विनंती आहे. महाभारतामध्ये सुध्दा एकदा प्रश्न असा झाला, की श्रीकृष्णाला अर्जुनाला म्हणावं लागलं आता उठ पार्था.. तुझ्याशिवाय पर्याय नाही. म्हणून हात जोडून तुम्हाला कळकळीची विनंती आहे. आपल्यासाठी अजित पवारांनी स्वत:ला झिजवलं आहे. त्यांना आता काहीतरी देण्याची वेळ आहे. या परिवर्तनामध्ये आपले आशिर्वाद द्या असं आवाहन विधान परिषदेचे विरोधी पक्षनेते धनंजय मुंडे यांनी केले.
राष्ट्रवादी काँग्रेसची परिवर्तन यात्रा पिंपरी चिंचवड येथे पोहोचली. सांगवी येथे झालेल्या सभेत धनंजय मुंडे बोलत होते. यावेळी राष्ट्रवादीचे नेते अजित पवार, प्रदेशाध्यक्ष जयंत पाटील, जेष्ठ नेते छगन भुजबळ, माजी आमदार विलास लांडे, आण्णा बनसोडे, शहराध्यक्ष संजोग वाघेरे पाटील, आदी मान्यवर व्यासपीठावर उपस्थित होते .
मावळ लोकसभेची उमेदवारी अजित पवार यांचे पुत्र पार्थ पवार यांना मिळणार असल्याची चर्चा गेल्या काही दिवसांपासून सुरू आहे. पिंपरी चिंचवड शहर आणि संपूर्ण मावळ मतदारसंघात राष्ट्रवादीच्या फ्लेक्सवर पार्थ यांचे फोटोही गेल्या काही दिवसांपासून झळकत आहेत. तर मतदार संघातील कार्यक्रमांना त्यांची हजेरीही लागू लागली आहे. मात्र याबाबत पक्षातील कोणत्याही वरिष्ठ नेत्याने तसे जाहीर वक्तव्य केलेले नाही. परंतू आज धनंजय मुंडेनी उठ पार्था.. तुझ्याशिवाय पर्याय नाही असं सूचक वक्तव्य करून एकप्रकारे पार्थ यांच्या उमेदवारीची जाहीर मागणी केली असल्याचे बोलले जात आहे.