पिंपरी (Pclive7.com):- झटपट पैसा कमविण्याच्या नादात उच्च शिक्षित तरुणांनी एटीएम फोडून ७७ लाखांची चोरी केल्याचे उघड झाले आहे. या प्रकरणी पिंपरी चिंचवडमधील दोन तरूणांना गुन्हे शाखा युनिट-३ च्या पथकाने अटक केली असून, त्यांच्याकडून ६६ लाख रुपये हस्तगत करण्यात आले आहेत. दोन्ही आरोपी हे मूळ जळगावचे असून उच्च शिक्षित आहेत.
मनोज उत्तम सूर्यवंशी (वय- ३० रा.जळगाव) याने इलेक्ट्रोनिक डिप्लोमा केला असून, किरण भानुदास कोलते (वय- ३५ रा. जळगाव) याने देखील मॅकेनिकल इंजिनिअरिंग केलं आहे. दोघेही उच्च शिक्षित असून झटपट श्रीमंत होण्याच्या हव्यासापोटी त्यांनी हे पाऊल उचलले असल्याचे समोर आले आहे.
पोलिसांनी दिलेल्या माहितीनुसार, पिंपरी चिंचवड पोलीस आयुक्तालयाच्या हद्दीतील दिघी पोलीस ठाण्याच्या परिसरात वडमुखवाडी आणि माऊलीनगर येथे दोघांनी रेकी करून एटीएम फोडून ७७ लाखांची रक्कम लंपास केली होती. दरम्यान, यातील आरोपी मनोज सूर्यवंशी हा इलेक्ट्रॉनिक डिप्लोमा केला असून काही वर्ष त्याने एटीएम मशीन बनवण्याच्या कंपनीत काम केले होतं. तसेच तो एटीएममध्ये बिघाड झाल्यास दुरुस्तीचे काम देखील करायचा. त्यामुळे त्याला एटीएम मशीनबाबत सर्व माहिती होती.
कालांतराने त्याने काम सोडले होते. त्याने जळगाव भुसावळ येथील ओळखीचा मित्र किरण कोलते याला सोबत घेऊन एटीएम फोडायचे आणि झटपट श्रीमंत होण्याचे स्वप्न बाळगले होते. त्यानुसार त्यांनी दोन एटीएमची रेकी करून डिजिटल लॉक तोडून एटीएममधील तब्बल ७७ लाख रुपये लंपास केले होते. पैकी काही रक्कम कोलतेच्या घरी, तर उर्वरीत रक्काम आरोपी किरण काम करत असलेल्या कंपनीत लपवून ठेवली होती. त्यांनी काही पैसे मौज मजेत उडवले देखील आहेत, असं पोलीस तपासात निष्पन्न झाले आहे.
दरम्यान, दोघांनी २०१७ मध्ये देखील तळेगाव दाभाडे येथे एटीएम फोडले असल्याचं तपासत निष्पन्न झाले आहे. ही कारवाई पोलीस आयुक्त कृष्ण प्रकाश, अपर पोलीस आयुक्त रामनाथ पोकळे, पोलीस उप आयुक्त (गुन्हे) सुधिर हिरेमठ, सहा पोलीस आयुक्त (गुन्हे) आर.आर. पाटील यांच्या मार्गदर्शनाखाली वरिष्ठ पोलीस निरीक्षक शंकर बाबर, सहायक पोलीस निरीक्षक सतिश कांबळे, पोलीस उप निरीक्षक गिरीश चामले, कर्मचारी हजरत पठाण, यदु आढारी, सचिन मोरे, सागर जैनक, त्रिनयन बाळसराफ, प्रविण पाटील, गंगाधर चव्हाण, योगेश्वर कोळेकर, राजकुमार हनमते, राहुल सुर्यवंशी, विठठल सानप, महेश भालचिम, प्रमोद ढाकणे, नाथा केकाण, गजानन आगलावे व नागेश माळी यांनी केली आहे.
Join Our Whatsapp Group