पिंपरी (Pclive7.com):- पिंपरीतील संत तुकारामनगर भागातील आचार्य अत्रे नाट्यगृहात अंधश्रद्धेला खतपाणी घालणारा प्रकार समोर आला होता.याप्रकरणी प्रसारमाध्यमांनी बाजू लावून धरल्यानंतर चार कामगारांवर आणि ठेकेदारावर गुन्हा दाखल करण्यात आला असून अटक करण्यात आली आहे.त्यातील ठेकेदार, मांत्रिक आणि कामगारांना एक दिवसाची पोलीस कोठडी मिळाली आहे. तर एक कामगार अद्याप फरार असून त्याचा शोध पिंपरी पोलीस घेत आहेत.
पोलिसांनी दिलेल्या माहितीनुसार, आचार्य अत्रे नाट्यगृहात गेल्या काही दिवसांपासून नूतनीकरणाचे काम सुरू होते. मात्र एका अंधाऱ्या कोपऱ्यात काम सुरू असताना, एक महिला ‘इकडे या’ अशी हाक मारत असल्याचा आणि तिच्या बांगड्यांचा आवाज होत असल्याचा भास काही कामगारांना झाला होता.त्यामुळे तेथे भूत असल्याच सांगत तेथून सर्व कामगारांनी पळ काढला होता. त्यानंतर दुसऱ्या दिवशी त्याच कामगारामधील एकाने विधिवत पूजा केली होती.
त्यानंतर बंद पडलेले काम पूर्ववत सुरू झाले होते.याप्रकरणी मांत्रिक (कामगार) अमर गोवर्धन चौधरी वय-५१ रा.दिघी रोड भोसरी, शशिकांत गणेश चौहान वय-३५ रा.भोसरी, अरूण अनुप्रसाद चौहान वय-५१ रा.भोसरी, ठेकेदार आनंद निर्मलसिंग गील वय-३२ रा.निगडी प्राधिकरण याना अटक केली. या सर्वांना न्यायलायय हजर केले असता त्यांना पोलीस कोठडी सुनावली आहे. तर श्रीकांत कुमार हा कामगार फरार असून त्याचा शोध पिंपरी पोलिसांकडून सुरू आहे.