पिंपरी (Pclive7.com):- कुदळवाडी भागात मोठ्या प्रमाणात अतिक्रमण कारवाई करण्यात आली. कारवाई झाल्यानंतर पुढे काय? याबद्दल नागरिकांच्या मनात अनेक शंका आहेत. या सर्व शंकांचे निराकरण करण्यासाठी कुदळवाडी ग्रामस्थ व पिंपरी चिंचवड महानगरपालिका अधिकारी यांच्यामध्ये बैठकीचे आयोजन करा अशी मागणी दिनेश यादव यांनी केली आहे.
दिनेश यादव यांनी महापालिकेचे अतिरिक्त आयुक्त प्रदीप जांभळे पाटील यांना दिलेल्या निवेदनात म्हटले आहे की, प्रत्येक परवानगी घेण्यासाठी एक खिडकी योजना अंमलात आणली गेली पाहिजे. महानगरपालिका आणि नागरिक यांच्यामध्ये मोठी दरी निर्माण झाल्याचे चित्र आहे. काही ठिकाणी झोनीन नसल्याने अनेक समस्या आहेत. तर काही ठिकाणी बांधकाम करण्यासाठी लागणारे आवश्यक परवानगी कागदपत्रे व इतर आराखडे याबद्दल चर्चा करण्याची गरज आहे. तसेच काही ठिकाणी रस्ते तयार करण्यात येत आहे, त्या ठिकाणी महानगरपालिके वतीने देण्यात येणारा मोबदला यामध्ये अनेक अडचणी येत आहेत. याबाबत देखील नागरिक आणि महानगरपालिकेचा सक्षम अधिकारी याच्या सोबत चर्चा करण्याचा माणस आहे.
यासर्व गोष्टींचा विचार करून एक साधकबाधक चर्चा करण्यासाठी प्रशासन आणि कुदळवाडी ग्रामस्थ यामध्ये एक बैठक आयोजित करावी अशी मागणी स्वीकृत सदस्य दिनेश यादव यांनी अतिरिक्त आयुक्त प्रदिप जांभळे पाटील यांच्याकडे निवेदनाद्वारे केली आहे. या निवेदनाला अतिरिक्त आयुक्तांनी सकारात्मक प्रतिसाद दिला असून लवकरच बैठक आयोजित करण्यात येईल असे सांगितले आहे.
Join Our Whatsapp Group