पिंपरी (Pclive7.com):- पिंपरी-चिंचवड पोलीस आयुक्तालय परिसरात शनिवारी सायंकाळी ट्रान्सफॉर्मरचा भीषण स्फोट होऊन आग लागल्याची घटना घडली. सायंकाळी सुमारे ७.३० वाजण्याच्या सुमारास झालेल्या या स्फोटामुळे परिसरात एकच खळबळ उडाली होती. मात्र, अग्निशामक दलाने वेळेत घटनास्थळी पोहोचून आगीवर नियंत्रण मिळवल्याने मोठा अनर्थ टळला.
नेमकी घटना काय?
मिळालेल्या माहितीनुसार, पोलीस आयुक्तालयाजवळील एका इमारतीबाहेरील ट्रान्सफॉर्मरमध्ये अचानक तांत्रिक बिघाड झाला. या बिघाडामुळे जोरदार स्फोट होऊन ट्रान्सफॉर्मरने पेट घेतला. स्फोटाचा आवाज मोठा असल्याने परिसरातील नागरिक घाबरून घराबाहेर आले. आगीच्या ज्वाळा शेजारील इमारतीच्या पार्किंगपर्यंत पोहोचल्याने तेथील वाहनांना धोका निर्माण झाला होता.
अग्निशामक दलाची धावपळ..
घटनेची माहिती मिळताच पिंपरी-चिंचवड अग्निशामक दलाच्या तीन गाड्या तात्काळ घटनास्थळी दाखल झाल्या. जवानांनी तत्परतेने पाण्याचा मारा करत आगीवर नियंत्रण मिळवले. त्यांच्या जलद कारवाईमुळे आग इमारतीच्या वरच्या मजल्यांपर्यंत पसरण्यापासून रोखली गेली.
वीजपुरवठा खंडित..
घटनेनंतर खबरदारीचा उपाय म्हणून महावितरणकडून परिसरातील वीजपुरवठा तात्पुरता खंडित करण्यात आला. या घटनेत सुदैवाने कोणतीही जीवितहानी झाली नसली, तरी ट्रान्सफॉर्मरचे मोठे नुकसान झाले आहे. घटना वर्दळीच्या ठिकाणी घडल्याने काही काळ परिसरात तणावाचे वातावरण निर्माण झाले होते. दरम्यान, रात्री उशिरापर्यंत वीजपुरवठा सुरळीत करण्याचे काम सुरू होते.
Join Our Whatsapp Group