आळंदी (Pclive7.com):- आळंदी-तुळापूर रस्त्यावरील एका आलिशान बंगल्यात सुरू असलेल्या रेव्ह पार्टीवर पुणे पोलिसांनी मध्यरात्री धाड टाकत मोठी कारवाई केली. या कारवाईत नशेच्या अवस्थेत असलेल्या तरुण-तरुणींसह अनेकांना ताब्यात घेण्यात आले असून घटनास्थळावरून अमली पदार्थ व इतर संशयास्पद साहित्य जप्त करण्यात आले आहे.
पोलिसांना मिळालेल्या गुप्त माहितीनुसार संबंधित बंगल्यात मोठ्या आवाजात संगीत सुरू होते आणि काही जण नशेचे पदार्थ सेवन करत असल्याची माहिती मिळाली होती. त्यानुसार पोलिसांच्या विशेष पथकाने छापा टाकला. कारवाईदरम्यान बंगल्यात मोठ्या प्रमाणात तरुण-तरुणी उपस्थित असल्याचे आढळून आले.
छाप्यात नशेसाठी वापरले जाणारे काही पदार्थ, मद्याच्या बाटल्या तसेच इतर साहित्य जप्त करण्यात आले आहे. ताब्यात घेतलेल्या व्यक्तींची वैद्यकीय तपासणी करण्यात येत असून त्यांच्या रक्त आणि मूत्र नमुन्यांची चाचणी केली जाणार आहे.
या प्रकरणात आयोजक कोण होते, बंगला भाड्याने घेण्यात आला होता का, तसेच अमली पदार्थांचा पुरवठा कुठून झाला याचा तपास पोलिसांकडून सुरू आहे. संबंधितांविरुद्ध अमली पदार्थ प्रतिबंधक कायदा तसेच इतर लागू कायद्यांनुसार गुन्हा दाखल करण्याची प्रक्रिया सुरू असल्याची माहिती पोलिसांनी दिली. या कारवाईमुळे आळंदी परिसरात खळबळ उडाली असून पोलिसांनी अशा बेकायदेशीर पार्ट्यांविरोधात कठोर कारवाईचा इशाराही दिला आहे.
Join Our Whatsapp Group