पिंपरी (Pclive7.com):- आरे कारेची भाषा करून ‘तुला कोरोना होईल..’ असं म्हणत मद्यधुंद पोलिस हवालदाराने पोलीस ठाण्यातच गोंधळ घालत महिला पोलीस कर्मचारीस शिवीगाळ केल्याची घटना घडली आहे. पिंपरी चिंचवड पोलीस आयुक्तालयाच्या हद्दीतील दिघी पोलीस ठाण्यात शुक्रवारी रात्री उशीरा हा धक्कादायक प्रकार घडला आहे.
या प्रकरणी संबंधित महिला पोलीस कर्मचारीने दिघी पोलीस ठाण्यात फिर्याद दिली आहे. त्यानुसार पोलीस कर्मचारी मारुती बढेकर यांच्या विरोधात गुन्हा दाखल करण्यात आला आहे. ते दिघी पोलीस ठाण्यात हवालदार म्हणून कार्यरत आहेत.
पोलिसांनी दिलेल्या माहितीनुसार, महिला पोलीस कर्मचारी फिर्यादी या दिघी पोलीस ठाण्यात ठाणे अंमलदार मदतनीस म्हणून शुक्रवारी रात्रपाळी ड्युटीवर होत्या. तर आरोपी पोलीस कर्मचारी बढेकर हे चऱ्होली येथे मार्शल म्हणून रात्रपाळी ड्युटीवर होते.
मात्र, ते तिथे न थांबता मद्यपान करून मद्यधुंद अवस्थेत दिघी पोलीस ठाण्यात गेले आणि पोलीस ठाण्यात हजर असलेल्या कर्मचाऱ्यांसमोर फिर्यादी महिला पोलीस कर्मचारी यांना तुला कोरोना होईल असं म्हणत शिवीगाळ केली, अशी माहिती दिघी पोलिसांनी दिली आहे. दरम्यान, शिस्तप्रिय पोलीस आयुक्त कृष्ण प्रकाश यावर काही निर्णय घेणार का याकडे आता सर्वांचे लक्ष लागले आहे.