पिंपरी (Pclive7.com):- पिंपरी चिंचवड महानगरपालिकेने कचरा संकलनाच्या नावाखाली शहरवासीयांवर लावलेला उपयोगकर्ता शुल्क रद्द करण्यात यावा अशी मागणी माजी विरोधी पक्षनेते नाना काटे यांनी महापालिका आयुक्त शेखर सिंह यांच्याकडे केली आहे.
नाना काटे यांनी दिलेल्या निवेदनात म्हटले आहे की, पिंपरी चिंचवड महानगरपालिकेने कचरा संकलनाच्या नावाखाली संपूर्ण शहरातील मिळकतधारकांच्या घरपट्टी पत्रकामध्ये २०१९-२० चा उपयोगकर्ता शुल्क थकबाकी म्हणून ५४० रु मिळकतकराच्या बिलात ही रक्कम जमा केली असून ती वसूल देखील करीत आहेत. तसेच दरवर्षीच्या कर मिळकत पत्रिकेमध्ये अश्या प्रकारचे शुल्क आकारण्यात येणार आहे. हे, अन्यायकारक असून तत्काळ हा निर्णय रद्द करण्यात यावा.
मुळातच अश्या कोणत्याही प्रकारचा कचरा संकलनाचा नावाखाली उपयोगकर्ता शुल्क मुंबई, ठाणे, पुणे, नाशिक आदी सारख्या महानगरपालिका घेत नाही. मग आपल्या पिंपरी चिंचवड महानगरपालिकेस अश्या प्रकारचा उपयोगकर्ता शुल्क घेण्याची एवढी घाई का..? शहरातील नागरिक कररूपातून लाखो रुपये कर महानगरपालिकेस भरतात. ते भरून सुद्धा त्यांना महानगरपालिका पुरेश्या मुलभूत सोयी सुविधा देत नाही. तसेच प्रशासक राजवटीच्या नावाखाली मनपा विविध कर व शुल्काच्या माध्यमातून शहरातील नागरिकांनची लुट करीत आहे. तरी आयुक्तांनी उपयोगकर्ता शुल्कच्या नावाखाली शहरवासीयांची चाललेली लुट थांबवावी व त्याबाबत काढलेला आदेश त्वरित रद्द करण्यात यावा अशी मागणी नाना काटे यांनी केली आहे.
Join Our Whatsapp Group