“अजित पवार सोबत आल्याने महायुतीची ताकद वाढली”, मावळ लोकसभेच्या उमेदवारीवर खासदार श्रीरंग बारणे यांचा दावा..!

२०१९ मध्ये ऐनवेळी अजित पवार यांचे पुत्र पार्थ पवार यांना मावळ लोकसभेची उमेदवारी देण्यात आली. अजित पवार यांनी पार्थ पवार यांना निवडून आणण्यासाठी मोठी ताकद लावली. तरी देखील सध्याचे विद्यमान खासदार श्रीरंग बारणे यांनी पार्थ पवार यांचा मोठ्या मताधिक्याने पराभव केला होता. याचे शल्य आजही अजित पवार यांच्या मनात असल्याचं बोललं जातं आहे. उपमुख्यमंत्री अजित पवार आणि खासदार श्रीरंग बारणे हे एकमेकांचे कट्टर विरोधक मानले जातात. तेच अजित पवार काही आमदारांसह शिंदे- भाजप सरकारमध्ये सामील झाल्याने नेमकी बारणे यांची काय भूमिका असणार याकडे सर्वांचे लक्ष होतं. परंतु, त्यांनी अजित पवार यांच स्वागत करत महायुतीची ताकद वाढल्याचं वक्तव्य त्यांनी केला आहे.

श्रीरंग बारणे म्हणाले, राज्यामध्ये मुख्यमंत्री एकनाथ शिंदे आणि उपमुख्यमंत्री देवेंद्र फडणवीस हे चांगलं काम करत होते. त्यांच्या याच नेतृत्वावर विश्वास ठेवून राष्ट्रवादीचे नेते अजित पवार काही आमदारांसह शिंदे आणि भाजपच्या सरकारमध्ये सामील झाले आहेत. यामुळे महायुतीची ताकद वाढेल असा विश्वास त्यांनी व्यक्त केला आहे. पुढे ते म्हणाले, देशाचे गृहमंत्री अमित शहा, राज्याचे मुख्यमंत्री एकनाथ शिंदे, उपमुख्यमंत्री देवेंद्र फडणवीस यांची दिल्लीमध्ये झालेल्या बैठकीत आगामी मावळ लोकसभेसाठी माझ्या नावावर शिक्कामोर्तब झाला असल्याचं खुद्द श्रीरंग बारणे यांनी म्हटलं असून त्या बैठकीला ते स्वतः उपस्थित होते.