राष्ट्रवादीच्या शिष्टमंडळाने घेतली अजित पवार यांची भेट
पिंपरी (Pclive7.com):- उपमुख्यमंत्री अजित पवार यांचे समर्थक व राष्ट्रवादी कॉंग्रेसचे आमदार अण्णा बनसोडे यांना मंत्रीमंडळाच्या विस्तारात संधी द्यावी यासाठी राष्ट्रवादी कॉंग्रेसचे शिष्टमंडळ शहराध्यक्ष अजित गव्हाणे यांच्या नेतृत्वाखाली मंगळवारी (दि. ११) अजित पवार यांना मुंबईत जाऊन भेटले.
अजित पवार यांनी उपमुख्यमंत्री पदाची पहाटे शपथ घेतली तेव्हा आमदार बनसोडे हे एकमेव आमदार त्यांच्या सोबत शेवटपर्यंत होते. आत्ताही अजित पवार यांनी बंड करुन शपथ घेतली तेव्हा आमदार बनसोडे त्यांच्या पाठीशीच राहिले आहेत. राष्ट्रवादीच्या अजित पवार यांना मानणाऱ्या पिंपरी चिंचवड शहर-जिल्ह्यातील पदाधिकारी व कार्यकर्त्यांची नुकतीच बैठक झाली. या बैठकीस माजी नगरसेवक, सर्व विभागांचे पदाधिकारी, कार्यकर्ते उपस्थित होते. या बैठकीत आमदार बनसोडे यांना शहरातून राज्याच्या मंत्रीमंडळात काम करण्याची संधी द्यावी, असा ठराव करण्यात आला. त्यानुसार आम्ही आमदार बनसोडे यांना संधी द्यावी, अशी मागणी करत आहोत, असे गव्हाणे व पदाधिकाऱ्यांनी अजित पवार यांना दिलेल्या निवेदनात म्हटले आहे.
शिष्टमंडळात अजित गव्हाणे, माजी नगरसेवक शाम लांडे, राहुल भोसले, पंकज भालेकर, मयूर कलाटे, निलेश डोके, विजय लोखंडे, धनंजय भालेकर, संजय औसरमल, विनय शिंदे, सागर कसबे आदिंचा समावेश होता.