पिंपरी (Pclive7.com):- ‘फ्रेंडशिप डे’ म्हणजेच मैत्रीदिनाचे औचित्य साधून जननी चॅरिटेबल ट्रस्टने पिंपळे सौदागर येथील साई अँबिअन्स – व्हिजन सोसायटी मध्ये घरेलू कामगारांच्या मुलांसाठी शालेय साहित्य वाटप कार्यक्रमाचे आयोजन केले होते. यावेळी कार्यक्रमाचे अध्यक्ष म्हणून नगरसेवक शत्रुघ्न काटे उपस्थित होते. तसेच प्रमुख पाहुणे म्हणून नगरसेविका निर्मलाताई कुटे उपस्थित होत्या.
नगरसेवक शत्रुघ्न काटे यांनी सर्वांना संबोधित करताना जननी चॅरिटेबल ट्रस्टच्या या स्तुत्य उपक्रमाचे अभिनंदन केले. तसेच त्यांच्या भावी वाटचालीस शुभेच्छा दिल्या. अशा या सामाजिक उपक्रमात जननी चॅरिटेबल ट्रस्टला आवश्यक ते सहकार्य करण्याचे आश्वासन त्यांनी यावेळी दिले.
यावेळी स्वर्गीय गोपीनाथजी मुंडे प्रतिष्ठान अध्यक्ष दीपक नागरगोजे, उद्योजक दीपक गांगुर्डे, साई अँबिअन्स-व्हिजन सोसायटीचे चेअरमन योगेश मैद, विजय पाटील, सावळे, कांतीलाल पुरी तसेच मोठ्या संख्येने सोसायटीतील सदस्य आणि मुलांचे पालक उपस्थित होते.
कार्यक्रमाचे सूत्र संचालन सौ. प्राजक्ता फुके यांनी केले. यावेळी त्यांनी ट्रस्टच्या पुढील कार्यक्रमामध्ये सामील होण्यासाठी लोकांना आवाहन केले. संदीप फुके यांनी आभार व्यक्त केले.
साई अँबिअन्स-व्हिजन सोसायटीमध्ये सुरक्षा रक्षक (सिक्युरिटी गार्ड) म्हणून कार्यरत असलेले माधव शिंदे यांची मुलगी कुमारी ज्ञानेश्वरी शिंदे ही १६ वर्षा खालील राष्ट्रीय व आंतरराष्ट्रीय स्तरावरील खेळाडू असून सध्या ती औरंगाबाद येथे इयत्ता १० वी मध्ये शिक्षण घेत आहे. तिची संपूर्ण १० वी च्या शालेय शिक्षणाची जबाबदारी जननी चॅरिटेबलने घेतली आहे. कु. ज्ञानेश्वरी हि सध्या औरंगाबाद येथे आंतरराष्ट्रीय स्तरावरील तलवारबाजी स्पर्धेची तयारी करत आहे. तसेच दि. ४ ऑगस्ट रोजी जननी चॅरिटेबल तर्फे दुष्काळग्रस्थ भागातील मंगळापुर ता. कोरेगाव येथे ६५ गरीब आणि गरजू विद्यार्थ्यांना शालेय साहित्य देण्यात आले.
जननी चॅरिटेबल ट्रस्ट हि संस्था २०१४ पासून पर्यावरण संवर्धन आणि विकास, महिला आणि बालकल्याण तसेच शिक्षण क्षेत्रात कार्यरत आहे. आजपर्यंत शालेय शिक्षण वाटपातून ५००० विद्यार्थ्यापर्यंत पोहोचले आहेत. दरवर्षी दुष्काळग्रस्थ आणि दुर्गम अश्या जंगली भागात शालेय साहित्य वाटप केले आहे. तसेच ग्रामीण महिलांमध्ये उद्योजकता वाढीसाठी बचत गट तयार करून त्यांना बाजार निर्माण करण्याचे काम करत आहे. या ट्रस्ट मध्ये संदीप फुके व प्राजक्ता फुके आणि विविध कार्यक्षेत्रातील लोक कार्यरत आहेत.