पिंपरी (Pclive7.com):- चिंचवड स्टेशन चौकात सुरू असलेल्या मेट्रोच्या कामादरम्यान पाण्याची मुख्य पाईपलाईन फुटल्याने मोठ्या प्रमाणात पाण्याची नासाडी झाली. या घटनेमुळे परिसरात पाण्याचे प्रचंड लोट वाहू लागले असून वाहतुकीवरही परिणाम झाला होता.
प्रत्यक्षदर्शींनी दिलेल्या माहितीनुसार, मेट्रोच्या कामासाठी सुरू असलेल्या खोदकामादरम्यान ही पाईपलाईन अचानक फुटली. त्यानंतर मोठ्या दाबाने पाणी बाहेर पडू लागल्याने काही काळ परिसर जलमय झाला. रस्त्यावरून वाहणाऱ्या पाण्यामुळे वाहनचालक आणि पादचाऱ्यांना मोठा त्रास सहन करावा लागला.
दरम्यान, शहरातील अनेक भागांमध्ये पाणीटंचाईची समस्या असताना अशा प्रकारे लाखो लिटर पाणी वाया गेल्याने नागरिकांनी तीव्र नाराजी व्यक्त केली आहे. संबंधित यंत्रणांच्या निष्काळजीपणामुळे ही घटना घडल्याचा आरोप नागरिकांकडून करण्यात येत असून दोषींवर कारवाई करण्याची मागणी होत आहे.
घटनेची माहिती मिळताच महापालिका आणि संबंधित विभागाचे कर्मचारी घटनास्थळी दाखल झाले. पाणीपुरवठा तात्पुरता बंद करून गळती रोखण्याचे आणि दुरुस्तीचे काम हाती घेण्यात आले आहे.
या घटनेमुळे काही भागातील पाणीपुरवठ्यावर परिणाम होण्याची शक्यता व्यक्त करण्यात येत असून नागरिकांनी संताप व्यक्त करत मेट्रो कामांदरम्यान अधिक काळजी घेण्याची मागणी केली आहे.
Join Our Whatsapp Group