पिंपरी (Pclive7com):- पिस्तुल विक्रीसाठी आलेल्या एकाला सांगवी पोलिसांनी अटक केली. त्याच्याकडून एक पिस्तुल आणि दोन जिवंत काडतुसे जप्त करण्यात आली आहेत. ही कारवाई सोमवारी (दि.२९) सकाळी विशालनगर येथे सकाळी सव्वा सातच्या सुमारास करण्यात आली. आरोपी विक्या घिसाडी उर्फ विकास बबन पवार (वय ४८, रा. शिवशक्ती तरुण मंडळ, रेल्वे लाईन जवळ, दापोडी पुणे) असे अटक केलेल्या आरोपीचे नाव आहे. याप्रकरणी पोलीस नाईक कैलास पर्वतराव केंगले यांनी सांगवी पोलीस ठाण्यात फिर्याद दिली आहे.
सांगवी पोलीस ठाण्याचे वरिष्ठ निरीक्षक रंगनाथ उंडे यांनी दिलेल्या माहितीनुसार, सोमवारी सकाळी सात वाजताच्या सुमारास पोलीस नाईक रोहीदास बोऱ्हाडे यांना मिळाली की, एक व्यक्ती विशालनगर येथील चोंधे लॉन्स, नदीच्या पुलाजवळ पिस्तुल विक्रीसाठी येणार आहे. त्यानुसार पोलिसांनी परिसरात सापळा लावला.काही वेळेत एक व्यक्ती कापडी पिशवी घेऊन संशयितरित्या फिरताना दिसला. पोलिसांनी त्याला ताब्यात घेतले. त्याच्याकडे असलेल्या पिशवीत काय आहे, असे विचारले असता त्याने पिशवी लपवून त्यात काहीही नसल्याचे पोलिसांना सांगितले. तो उडवाउडवीची उत्तरे देत असल्याने पोलिसांनी त्याची पिशवी तपासली असता त्यात एक गावठी कट्टा आणि दोन जिवंत काडतुसे आढळून आली. आरोपी विक्या याने तो गावठी कट्टा विक्री करण्यासाठी आणला असल्याचे पोलीस तपासात समोर आले आहे. आरोपीच्या विरोधात भारतीय हत्यार कायदा कलम 3(25) सह महाराष्ट्र पोलीस अधिनियम कलम 37(1) सह 135 प्रमाणे गुन्हा दाखल करण्यात आला आहे.
ही कामगिरी पोलीस आयुक्त संदीप बिष्णोई, अपर आयुक्त रामनाथ पोकळे, उपायुक्त विनायक ढाकणे, सहाय्यक आयुक्त श्रीधर जाधव, वरिष्ठ निरीक्षक रंगनाथ ऊंडे, निरीक्षक (गुन्हे) अजय भोसले यांच्या मार्गदर्शनाखाली सहाय्यक निरीक्षक दत्तात्रय गुळीग, उपनिरीक्षक यशवंत साळुंके, कर्मचारी रोहीदास बोऱ्हाडे, कैलास केगले, सोमनाथ असवले, विनायक देवकर, शशिकांत देवकांत, अरुण नरळे, नितीन खोपकर, अनिल देवकर, दिपक पिसे, हेमंतकुमार गुत्तीकोंडा यांच्या पथकाने केली आहे.
Join Our Whatsapp Group