पिंपरी (Pclive7.com):- कोरोना संसर्गाच्या पार्श्वभूमीवर पिंपरी चिंचवड महापालिका क्षेत्रासाठीचा सुधारित आदेश आयुक्त श्रावण हर्डीकर यांनी बुधवारी रात्री जारी केला. त्याची अंमलबजावणी गुरुवारपासून झाली असून, तो ३० सप्टेंबरपर्यंत लागू राहणार आहे.
राज्य सरकारपाठोपाठ स्थानिक स्वराज्य संस्था पातळीवर आयुक्त हर्डीकर यांनी अनलॉकची नियमावली जाहीर केली आहे. त्यानुसार कोणत्या गोष्टींना परवानगी राहील. कोणत्या बाबींना प्रतिबंध राहील, याबाबत स्पष्ट केले आहे. वैद्यकिय व अत्यावश्यक सेवा, तसेच अत्यावश्यक वस्तू पुरवठ्याची साखळी कायम ठेवण्यासाठी आवश्यक वाहतूक वगळता प्रतिबंधित क्षेत्रामधून नागरिकांना ये-जा करणेसाठी प्रतिबंध असेल, असे आदेशात नमूद केले आहे.
सर्व आस्थापना प्रमुखांनी त्यांचे कार्यरत कर्मचारी यांच्या सुरक्षिततेसाठी त्यांच्या मोबाइलमध्ये आरोग्य सेतू अॅप आणि पिंपरी चिंचवड महापालिकेचे स्मार्ट सारथी अॅप डाऊनलोड केल्याची खात्री करून घ्यावी. आरोग्य सेतू अॅपच्या माध्यमातून रोगाची संभाव्य लागण विषयी सूचना प्राप्त होत असल्यामुळे व्यक्तीस स्वसंरक्षणासाठी त्याचा उपयोग होतो. स्मार्ट सारथी अॅपमध्ये कोविड-१९ बाबत विविध मार्गदर्शक सूचना, आपल्या आजूबाजूला उपलब्ध असणाऱ्या औषधांची दुकाने, महापालिकेचे कोविड-१९ फ्लू क्लिनिक या सोयीसुविधांची माहिती प्राप्त होते, असे म्हटले आहे.
घराबाहेर पडताना तोंडाला मास्क बंधनकारक, सोशल डिस्टन्सिंगचे पालन आवश्यक असल्याचे स्पष्ट करण्यात आले आहे. शिवाय ६५ वर्षावरील व्यक्ती, अति जोखमीचे आजार (मधुमेह, उच्च रक्त दाब, दमा, यकृत व मूत्रपिंडाचे आजार, कर्करोग, एचआयव्ही बाधित रुग्ण इ.) असलेल्या व्यक्ती, गरोदर महिला, दहापेक्षा कमी वयोगटातील मुले यांना अत्यावश्यक सेवा व वैद्यकीय कारणाशिवाय घराबाहेर जाता येणार नाही, अशी अट घालण्यात आली आहे.
बंद राहणार..
– परवानगीशिवाय आंतरराष्ट्रीय विमान, मेट्रो व रेल्वे प्रवास
– शाळा, कॉलेज, शैक्षणिक व प्रशिक्षण संस्था, कोचिंग क्लासेस
– हॉटेल्स, रेस्टॉरंट व इतर आदरातिथ्य सेवा
– सिनेमा हॉल, व्यायामशाळा, जलतरण तलाव- बार, सभागृह, नाट्यगृह, मनोरंजन पार्क- सर्व धार्मिक स्थळे, कार्यक्रम व सभा, संमेलने
या सेवांना परवानगी..
– वाहतुकीसाठी परवानगीची गरज नाही.
– अत्यावश्यक सेवा व पीएमपी वाहतूक सुरू
– शॉपिंग मॉल, मार्केट सुरू (सिनेमा हॉल बंद)
– हॉटेल व लॉज शंभर टक्के क्षमतेने सुरू
– सर्व मैदानी खेळ व व्यायाम प्रकारांना परवानगी
– सलून व ब्युटीपार्लर पूर्वी दिलेल्या आदेशानुसार चालणार