पिंपरी (Pclive7.com):- पिंपरी गाव येथील पवनेश्वर मंदिर जवळ असलेल्या महात्मा फुले क्रीडांगणात घाणीचे साम्राज्य पसरले असून हे मैदान मद्यपींचा अड्डा बनला आहे. त्यामुळे येथे येणाऱ्या मुलांना, नागरिकांना याचा प्रचंड त्रास होत असून प्रशासनाने तातडीने याकडे लक्ष घालून उपाययोजना करण्यात याव्यात अशी मागणी सामाजिक कार्यकर्ते सुहास कुदळे यांनी केली आहे.
सुहास कुदळे यांनी दिलेल्या प्रसिध्दी पत्रकात म्हटले आहे की, पिंपरी गाव परिसरात नव्याने विकसित होत असलेल्या या महात्मा फुले क्रीडांगणात रोज सकाळी-संध्याकाळी व्यायामासाठी, वॉकिंगसाठी जेष्ठ नागरिक, तरुण, खेळाडू येत असतात. या घाणीच्या साम्राज्यामुळे त्यांना खूप नाहक त्रास होत आहे. तसेच संध्याकाळच्या वेळेस त्या ठिकाणी मद्यपींचा अड्डा बनलेला आहे. महापालिका प्रशासनाला व पोलीस प्रशासनाला वारंवार तक्रारी देऊन सुद्धा तेथे कारवाई होत नाही.
या ठिकाणी अक्षरशः रोज संध्याकाळी मद्यपींची मैफिल बसते. खूप मोठ्या प्रमाणात तेथील स्थानिक नागरिकांना व खेळाडू वर्गांना जेष्ठ नागरिकांना खूप भयानक त्रासाला सामोरे जावे लागत आहे. आपण या ठिकाणी साफसफाई करून घ्यावी व पोलिसांनी मद्यपींवर योग्य ती कारवाई करावी. जेणेकरून साफसफाई केल्याने नागरिकांची दुर्गंधीतून सुटका होईल व इतर होणाऱ्या नाहक त्रासातून नागरिकांचा बचाव होण्यासाठी मदत होईल अशी मागणी सुहास कुदळे यांनी केली आहे.
Join Our Whatsapp Group