आकुर्डी येथे सायबेरियन हस्की कुत्र्याची क्रूरपणे मारहाण करून हत्या

पिंपरी (Pclive7.com):- पिंपरी-चिंचवडमधील आकुर्डी परिसरात शनिवारी (दि.१३ सप्टेंबर) पहाटे एका सायबेरियन हस्की कुत्र्याला क्रूरपणे मारहाण करण्यात आली. त्यात त्याचा मृत्यू झाला. या कुत्र्याची हत्या करणाऱ्या व्यक्तीविरोधात गुन्हा दाखल करण्यात आला आहे. या घटनेचा व्हिडिओ सोशल मीडियावर व्हायरल झाला असून, याबाबत लोकांकडून संताप व्यक्त केला जात आहे.

कुत्र्याचा सांभाळ करणाऱ्या राहुल सदाशिव मार्कर (वय ३४, रा. चिखली) यांनी निगडी पोलीस ठाण्यात तक्रार दाखल केल्यानंतर एका अज्ञात व्यक्तीविरुद्ध गुन्हा नोंदवण्यात आला आहे.

पोलिसांनी दिलेल्या माहितीनुसार, तक्रारदार मार्कर हे ‘सिम्बा’ नावाच्या तीन वर्षांच्या नर सायबेरियन हस्कीचा सांभाळ करत होते. शनिवारी पहाटे २ वाजण्याच्या सुमारास अज्ञात व्यक्तीने सिम्बाला दगड आणि लाकडी दांडक्याने मारहाण करून ठार केले. त्यानंतर त्याने मृतदेह कचरापेटीत फेकून दिला.

तक्रारदारांच्या म्हणण्यानुसार, कुत्रा खूप प्रेमळ होता. तो आरोपीच्या दिशेने फक्त शेपूट हलवत आणि वास घेत होता. त्याला पुढे काय होणार आहे, याची कल्पना नव्हती. आरोपीने त्याला बेदम मारहाण करून ठार केले. तो जवळच्या एका चायनीज फूड स्टॉलवर आचारी म्हणून काम करतो.

सीसीटीव्ही फुटेजमध्ये दिसत आहे की, कुत्रा सुरुवातीला आरोपीसोबत खेळत आहे, त्याला चाटत आहे, शेपूट हलवत खेळत आहे. सुरुवातीला आरोपीही त्याच्यासोबत खेळताना दिसतो. मात्र, काही वेळाने तो कुत्र्याला दगडाने मारतो आणि नंतर लाकडी दांडक्याने अमानुष मारहाण सुरू ठेवतो, ज्यामुळे कुत्र्याचा जागीच मृत्यू होतो. कुत्र्याचा मृत्यू झाल्यानंतर त्याचा मृतदेह ओढून कचरापेटीत फेकून देण्यात येतो. या प्रकरणाचा पुढील तपास पोलीस निरीक्षक (गुन्हे) भोजराज मिसाळ करत आहेत.