पिंपरी (Pclive7.com):- पिंपरी-चिंचवड शहरातील चऱ्होली भागातून एक धक्कादायक घटना समोर आली आहे. मित्रांनी एका व्यावसायिकावर गोळीबार केला आहे. यात ३७ वर्षीय नितीन शंकर गिलबिले यांचा मृत्यू झाला आहे. चऱ्होली येथील अलंकापुरम चौकाजवळ ही घटना घडली आहे.
मिळालेल्या माहितीनुसार, अलंकापुरम ९० फुटी रोडवर श्री साई रोड कॅरिअर या ठिकाणी साडेपाच ते ६ वाजण्याच्या सुमारास ही घटना घडली आहे. या ठिकाणी काळ्या रंगाच्या फॉर्च्यूनर गाडीत बसलेले असताना नितीन शंकर गिलबिले यांच्यावर त्यांचेच मित्र अमित जीवन पठारे (रा.पठार मळा) आणि विक्रांत ठाकुर (सोलू खेड) यांनी गोळीबार केला. या गोळीबारात नितीन गंभीर जखमी झाले होते. त्यांना उपचारासाठी रुग्णालयात दाखल करण्यात आले होते. मात्र त्यांचा मृत्यू झाला आहे.
मयत नितीन गिलबिले आणि अमित पठारे, विक्रांत ठाकूर हे तिघेही एकमेकांचे मित्र असल्याची माहिती समोर आली आहे. हे तिघे जमिनीच्या प्लॉटिंगचा व्यवसाय करत होते. याच व्यवसायामधील व्यवहाराच्या वादातून हा गोळीबार केला असल्याची शक्यता वर्तवली जात आहे. या गोळीबारानंतर अमित पठारे हे विक्रांत ठाकूर फरार झाल्याची माहिती समोर आली आहे. या दोघांचा शोध घेतला जात असून दिघी पोलीसांनी या घटनेबाबत अधिक तपास सुरू केला आहे.
Join Our Whatsapp Group