पिंपरी (Pclive7.com):- पिंपरी- चिंचवड शहराचं नाव बदलून जिजाऊनगर ठेवण्यात यावं अशी मागणी भक्ती शक्ती प्रतिष्ठानकडून करण्यात आली आहे. या आशयाचे फेक्स पिंपरी-चिंचवड शहरातील विविध भागात लावण्यात आल्याचे पाहायला मिळत आहे. छत्रपती शिवाजी महाराजांच्या ३५० व्या राज्याभिषेक दिनाच्या औचित्य साधून भक्ती शक्ती प्रतिष्ठानचे महेश बारणे यांच्यावतीने ही मागणी करण्यात आली आहे.
महाराष्ट्रातील अनेक शहरांची नावे बदलण्यात आलेली आहेत. किंबहुना ती बदलण्यात येत आहेत. अशा परिस्थितीमध्ये आता पिंपरी-चिंचवड शहराचे देखील नाव बदलण्याची आग्रही भूमिका भक्ती शक्ती प्रतिष्ठानकडून घेण्यात येत आहे. शहरातील विविध भागात पिंपरी-चिंचवड शहराचे जिजाऊनगर नाव करण्यात यावे अशी मागणी आता जोर धरू लागलेली आहे. शहरातील वेगवेगळ्या ठिकाणी भक्ती शक्ती प्रतिष्ठानकडून पिंपरी चिंचवड शहराचे जिजाऊनगर नाव करण्यात यावे यासाठी फ्लेक्स लावण्यात आले आहेत. त्यामुळे शहरांमध्ये चर्चेला उधाण आले आहे.
पिंपरी-चिंचवड शहराचं नाव बदलण्याच्या चर्चा या अगोदर २००६ ला झाली होती. तशा बातम्या देखील छापून आल्या. पण, स्थानिकांनी पिंपरी- चिंचवड शहराचे नाव बदलण्यास विरोध केला होता. आता पुन्हा एकदा शहराचे नाव बदलण्याची मागणी होते आहे.