पिंपरी (Pclive7.com):- ‘कलारंग’ सांस्कृतिक कला संस्था, पिंपरी चिंचवडच्या २१ व्या वर्धापन दिनानिमित्त बुधवार दि. २२ जानेवारी २०२० रोजी ‘एक तोचि नाना’ हा कार्यक्रम आयोजित करण्यात आला आहे. या कार्यक्रमात सुप्रसिध्द अभिनेते व नाम फांऊडेशनद्वारे सामाजिक क्षेत्रात कार्यरत असणारे नाना पाटेकर यांचा सांस्कृतिक व सामाजिक प्रवास उलगडणारी प्रकट मुलाखत होणार आहे. ही मुलाखत प्रसिध्द मुलाखतकार व संवादक समीरन वाळवेकर घेणार आहेत, अशी माहिती कलारंग संस्थेचे अध्यक्ष अमित गोरखे यांनी रविवारी पत्रकार परिषदेत दिली.
“कलारंग” सांस्कृतिक कला संस्था पिंपरी चिंचवड, परिसरात सांस्कृतिक क्षेत्रात गेल्या २० वर्षापासून कार्यरत असून संस्थेचा शहरातील सांस्कृतिक वाटचालीत मोठा वाटा आहे. संस्थेच्या माध्यमातून मराठी चित्रपट, नाट्य क्षेत्रातील अनेक दिग्गज कलावंतांना सन्मानित करण्यात आले असून प्रामुख्यान विक्रम गोखले,सचिन पिळगांवकर, अशोक सराफ, लक्ष्मीकांत बेर्डे, रिमा लागू, अजय अतुल, मृणाल कुलकर्णी,कुलदिप पवार यांसारख्या अनेक कलावंतांची नावे घ्यावी लागतील. यावर्षी कलारंग संस्थेच्या २१ व्या वर्धापन दिनाचे औचित्य साधून नाना पाटेकर यांचा जीवनपट शहरवासियांसमोर उलगडण्याचा प्रयत्न आहे. हा कार्यक्रम बुधवारी सायंकाळी ५:०० वाजता चिंचवड येथील प्रा. रामकृष्ण मोरे प्रेक्षागृहात होणार आहे.
हा कार्यक्रम सर्वांसाठी खुला असून या कार्यक्रमात काही स्थानिक कलाकार व सामाजिक कार्यकर्ते यांचा सन्मान करण्यात येणार आहे. कार्यक्रमाला प्रमुख अतिथी म्हणून मा. डॉ. पी. डी. पाटील, (सर्वेसर्वा डॉ. पी. डी. पाटील प्रतिष्ठान), आमदार लक्ष्मण जगताप, खासदार अमर साबळे, आमदार महेश लांडगे, सचिन पटवर्धन (अध्यक्ष, लेखा समिती), सदाशिव खाडे (अध्यक्ष PCNDTE ), माई ढोरे (महापौर), भाऊसाहेब भोईर (अध्यक्ष अ.भा.ना.प), उमाताई खापरे, (भाजपा नेत्या), तुषार हिंगे (उपमहापौर), एकनाथ पवार (पक्षनेते, पिं.चिं.), विलास मडेगिरी (अध्यक्ष, स्थायी समिती), मधुकर बाबर (अध्यक्ष, जिजामाता पतसंस्था) उपस्थित राहणार आहेत.
शहरातील नाट्य, कला आणि सांस्कृतिक क्षेत्रातील, तसेच इतर रसिकांनी कार्यकमाला आवर्जून उपस्थित राहावे, असे आवाहन अमित गोरखे यांनी केले आहे. या कार्यक्रमाचे मोफत प्रवेशिका मिळण्यासाठी नॉव्हेल्स् एन. आय. बी. आर. कॉलेज ऑफ हॉटेल मॅनेजमेंट अॅण्ड केटरिंग टेक्नॉलॉजी, संत तुकाराम व्यापार संकुल, निगडी येथे सकाळी ९ ते ५ या वेळात उपलब्ध असेल. प्रवेशिका मिळण्यासाठी ९८८१५४००६६/९८८१५२००६६ संपर्क साधावा, असे आवाहनही त्यांनी केले आहे.
या पत्रकार परिषदेला कलारंग संस्थेचे उपाध्यक्ष शैलेश लेले, सचिव दिनेश देशमुख, कार्यप्रमुख आशा नेगी, संकेत लोंढे, सुप्रिया धाईजे, रमेश शिंदे आदी उपस्थित होते.
Join Our Whatsapp Group