मुंबई (Pclive7.com):- महाराष्ट्राचे मुख्यमंत्री म्हणून भाजप नेते देवेंद्र फडणवीस यांनी काल शपथ घेतली. देवेंद्र फडणवीस यांनी महाराष्ट्राचे मुख्यमंत्री म्हणून तिसऱ्यांदा शपथ घेतली. राज्यात महायुतीचं सरकार आल्यानंतर आज मोठा निर्णय घेण्यात आला आहे. 2001 बॅचचे महाराष्ट्र केडरचे भारतीय प्रशासकीय सेवेतील अधिकारी श्रीकर परदेशी यांची बदली करण्यात आली आहे. श्रीकर परदेशी यांना मुख्यमंत्र्यांचे मुख्य सचिव म्हणून नियुक्त करण्यात आलं आहे. परदेशी यांनी यापूर्वी देखील देवेंद्र फडणवीस यांच्यासोबत काम केलं आहे. श्रीकर परदेशी यांनी प्रतिनियुक्तीवर पीएमओमध्ये देखील काम केलं आहे. अत्यंत कार्यक्षम, स्वच्छ प्रशासकिय अधिकारी म्हणून परदेशी यांचे नाव आहे. कुठल्याही राजकीय दबावाखाली न येता काम केल्याने पिंपरी चिंचवड महापालिका आयुक्त म्हणून त्यांची कारकिर्द गाजली होती.
देवेंद्र फडणवीस यांनी काल राज्याचे मुख्यमंत्री म्हणून सूत्रं हाती घेतली. आज महायुती सरकारनं मोठा निर्णय घेत श्रीकर परदेशी यांची बदली केली आहे. श्रीकर परदेशी आता मुख्यमंत्र्यांचे मुख्य सचिव म्हणून काम पाहतील. यापूर्वी 12 जुलै 2022 रोजी श्रीकर परदेशी यांची तत्कालीन उपमुख्यमंत्र्याचे उपसचिव म्हणून बदली करण्यात आली होती. त्यावेळी देवेंद्र फडणवीस हे उपमुख्यमंत्री होते. म्हणजेच आता देवेंद्र फडणवीस मुख्यमंत्री झाल्यानंतर श्रीकर परदेशी यांची मुख्यमंत्र्यांचे मुख्य सचिव म्हणून बदली करण्यात आली आहे.
कोण आहेत श्रीकर परदेशी?
श्रीकर परदेशी भारतीय प्रशासकीय सेवेतील 2001 च्या बॅचचे महाराष्ट्र केडरचे अधिकारी आहेत. त्यांनी विविध जिल्ह्यांचे जिल्हाधिकारी आणि महापालिका आयुक्त म्हणून काम केलं आहे. ते नांदेडचे जिल्हाधिकारी होते. याशिवाय पिंपरी चिंचवड महापालिकेचे आयुक्त म्हणून देखील त्यांनी काम केलं होतं. राज्याचे नोंदणी महानिरीक्षक असताना त्यांनी या विभागाच्या महसुलात मोठी वाढ करून शिस्त लावली.
दरम्यानच्या काळात श्रीकर परदेशी यांनी पंतप्रधान कार्यालयात म्हणजेच पीएमओमध्ये प्रतिनियुक्तीवर काम केलं होतं. तो कालावधी संपल्यानंतर ते राज्यात जून 2021 मध्ये परतले होते. एकनाथ शिंदे आणि देवेंद्र फडणवीस यांचं सरकार 30 जून 2022 ला स्थापन झाल्यानंतर काही दिवसांमध्येच श्रीकर परदेशी यांना सिकॉमच्या व्यवस्थापकीय संचालक पदावरुन उपमुख्यमंत्र्याचे मुख्य सचिव म्हणून नियुक्त करण्यात आलं होतं.
Join Our Whatsapp Group