पिंपरी (Pclive7.com):- पिंपरी चिंचवड महापालिका हद्दीतील वाकड येथील ‘यूरो’ स्कूलवर शिक्षण विभागाने कारवाईचा बडगा उगारला आहे. नियमबाह्यपद्धतीने पालकांना जबरदस्तीने शालेय साहित्याची विक्री शाळेत करण्यात येत होती. या ठिकाणी शालेय गणवेश, वह्या, पुस्तके ठेवलेल्या खोल्या ‘सील’ करण्यात आल्या आहेत.
राज्य सरकारच्या २००४ च्या निर्णयानुसार शाळेत शालेय साहित्याची विक्री करण्यास मनाई केली होती. पण, २०१६ मध्ये उच्च न्यायालयाने शालेय वस्तुंची विक्री करु शकता. पण, किमती अवाजवी नसावी. साहित्य खरेदीसाठी पालकांना जबरदस्ती करु नये असा निर्णय दिला आहे. वाकड येथील यूरो शाळेत पालकांना शालेय साहित्य खरेदीसाठी जबरदस्ती केली जात असल्याच्या तक्रारी महापालिकेकडे आल्या होत्या. त्यानुसार कारवाई केल्याचे महापालिकेच्या शिक्षण विभागाने सांगितले आहे.
कारवाईबाबत माहिती देताना शिक्षण विभागाचे पर्यवेक्षक विलास पाटील म्हणाले की, वाकड परिसरात असणाऱ्या ‘यूरो’ स्कूलमध्ये नियमबाह्य पद्धतीने तसेच चढ्या दराने वह्या पुस्तकांची विक्री होत असल्याची तक्रार शिक्षण विभागाला आली होती. त्यानुसार पाहणी केली असता शाळेच्या दोन खोल्यांमध्ये लाखो रुपयांची वह्या पुस्तके, गणवेश विक्री होत असल्याचे निदर्शनास आले. पालकांना शालेय साहित्य खरेदीसाठी जबरदस्ती केली जात होती. साहित्याची अवाजवी किंमत होती. त्यानुसार पुस्तके, गणवेश ठेवलेल्या खोल्यांना सील ठोकण्यात आले आहे.
Join Our Whatsapp Group