तुकोबांच्या नाम गजराने देहूनगरी दुमदुमली; लाखो भाविकांच्या उपस्थितीत बीज सोहळा संपन्न

दोन वर्षांनंतर देहूनगरीत जगतगुरु संत तुकाराम महाराज यांचा सदेह वैकुंठ गमन सोहळा म्हणजेच बिजोत्सव मोठ्या भक्तिभावाने साजरा झाला आहे. यावर्षी करोनाचे निर्बंध शिथिल झाले असून महाराष्ट्राच्या कानाकोपऱ्यातून वारकरी देहूत दाखल झाले होते. दर्शन रांग तसेच इतर ठिकाणी काही अनुचित प्रकार घडू नये म्हणून पिंपरी-चिंचवड पोलिसांचा मोठा फौजफाटा तैनात करण्यात आला होता.

दरवर्षीपेक्षा अधिक संख्येने वारकरी देहूत दाखल झाल्याने देहू तुकोबांच्या जयघोषाने दुमदुमून गेली होती. संत तुकाराम महाराज संस्थान कडून बिजोत्सवानिमित्त मंदिरावर विद्युतरोषणाई करण्यात आली होती. तसेच, फुलांची आकर्षक सजावट देखील करण्यात आली होती. याचे विहंगम दृश्य हे ड्रोन कॅमेऱ्यातून संस्थांकडून टिपण्यात आले होते.