पिंपरी (Pclive7.com):- वाहतूक नियमांचा भंग करणाऱ्या तब्बल २५ हजार वाहनचालकांवर खटले दाखल करण्यात आले आहेत, तर राँग साइडने जाणाऱ्या सुमारे ५०० जणांवर गुन्हे दाखल करण्यात आले आहेत. येत्या आठवड्यापासून वाहनचालकांच्या घरी जाऊन दंड वसूल करण्यात येणार आहे. पिंपरी चिंचवड पोलिस आयुक्त आर. के. पद्मनाभन यांनी दिलेल्या आदेशानंतर अवघ्या महिनाभरात ही कारवाई करण्यात आली आहे.
आयुक्तालयातील १४ पोलिस ठाण्यांपैकी एकट्या पिंपरी पोलिस ठाण्यात १० हजार १९९ जणांवर कारवाई करण्यात आली आहे. विविध कलमांनुसार हे खटले दाखल झाले आहेत, तर ११४ जणांवर राँग साइडने गेल्याबाबत गुन्हे दाखल केले आहेत. या सर्वांना कोर्टात हजर करण्यात आले. त्यापैकी ७० जणांना कोर्टाने दंड ठोठावला. चाकण विभागातील दिघी पोलिस ठाण्यात १४३६, आळंदी पोलिस ठाण्यात १०७६, चाकण पोलिस ठाण्यात १३६४ जणांवर खटले दाखल करण्यात आले आहेत; तसेच भोसरी एमआयडीसी पोलिस ठाण्यात ९२६ जणांवर कारवाई करण्यात आली आहे. तळेगाव एमआयडीसी पोलिस ठाण्यात १३० जणांवर, तळेगाव दाभाडे पोलिसांकडून १३०६ जणांवर, वाकड पोलिस ठाण्यात १७२० जणांवर कारवाई करण्यात आली आहे. नो इंट्री, नो पार्किंग, मोबाइलवर बोलणे, सिग्नल तोडणे, डबल पार्किंग, ट्रीपल सीट, फॅन्सी नंबर प्लेट, हेल्मेट नसणे, फुटपाथ पार्किंग करणाऱ्यांवर हे गुन्हे दाखल झाले आहेत.
वाहतूक विभागाला कोंडी सोडविण्याबरोबरच वाहतूक नियमनाचा ताण असतो. त्यामुळे पोलिस ठाण्याच्या अधिकाऱ्यांनी नियमभंग करणाऱ्यांवर कारवाई करण्याचे आदेश आयुक्तांनी दिले होते. पोलिस ठाण्याबरोबरीनेच वाहतूक विभागाने देखील मोठी कारवाई केली आहे. पिंपरी वाहतूक विभागाने अडीच हजार जणांवर कारवाई केली आहे. निगडी वाहतूक विभागाने ४ हजार जणांवर कारवाई केली आहे, तर निगडी पोलिस ठाण्याने ११०५, देहूरोड पोलिस ठाण्याने ३७५ जणांवर कारवाई केली आहे. चिंचवड वाहतूक विभागाने राँग साइडने जाणाऱ्या १३ जणांवर गुन्हे दाखल करून त्यांना कोर्टात हजर केले. चिंचवड पोलिस ठाणे आणि चिंचवड वाहतूक विभागाने मिळून ५८२८ जणांवर कारवाई केली आहे.
एकीकडे एवढ्या मोठ्या प्रमाणात ही कारवाई होत असतानाच दुसरीकडे काही पोलिस ठाण्याच्या अधिकाऱ्यांमध्ये पोलिस आयुक्तांच्या आदेशाबाबत गांभीर्य नसल्याचे दिसून येत आहे. आपल्या पोलिस ठाण्यात किती कारवाई झाली याची कोणतीच कल्पना पोलिस निरीक्षकांना नसल्याचेही काही निरीक्षकांच्या बोलण्यातून जाणवले. त्यामुळे अशा निरीक्षकांवर पोलिस आयुक्तांकडून कारवाईचा बडगा उगारला जाण्याची शक्यता आहे. त्याचबरोबर मुख्य नियंत्रणकक्ष आणि वाहतूक नियंत्रणकक्षाकडे शहरात आयुक्तांच्या आदेशानंतर किती कारवाई झाली याची एकत्रित माहिती उपलब्ध नसल्याचेही वरिष्ठ अधिकाऱ्यांनी केलेल्या चौकशीत उघड झाले. त्यामुळे नियंत्रणकक्षाच्या कारभारावर देखील वरिष्ठ अधिकाऱ्यांनी नाराजी व्यक्त केली आहे.
# राँग साइडने वाहने चालविणे
* पोलिस ठाणे –गुन्हे
* पिंपरी – ११४
* वाकड – ११०
* दिघी- ०५
* आळंदी- ११
* चाकण – ०५
* तळेगाव एमआयडीसी- ०१
* तळेगाव दाभाडे – २२
* हिंजवडी ४५
* सांगवी १३
पोलिस घरी जाऊन दंड वसूल करणार
वाहतूक नियमांचे भंग करणाऱ्या वाहनचालकांच्या घरी जाऊन ई चलन प्रक्रियाद्वारे दंड वसूल करण्यात येणार आहे. त्यासाठी सध्या पोलिस कर्मचाऱ्यांना प्रशिक्षण देण्यात येत आहे. नियमभंग करणाऱ्या अनेकांवर सध्या शहरात कारवाई करण्यात येत आहे. परंतु, त्यातील बऱ्याच जणांनी दंड भरलेला नसतो. त्यामुळे आमचे कर्मचारी आता अशा लोकांच्या घरी जाऊनच दंड वसूल करतील. वाहतूक नियमांचे भंग करणाऱ्या हजारो लोकांवर खटले दाखल होत आहेत. ही कारवाई अधिक तीव्र करण्यात येणार आहे. नागरिकांनी नियमांचे पालन करावे, असे पिंपरी-चिंचवडचे पोलिस आयुक्त आर. के. पद्मनाभन यांनी सांगितले.
Join Our Whatsapp Group